«Я знаю!»
12 студзеня ў эфіры “Беларусь 1” стартаваў другі сезон інтэлектуальнай шоу-віктарыны для ўсёй сям’і “Я знаю!”
Сумесны праект Белтэлерадыёкампаніі і Міністэрства адукацыі Рэспублікі Беларусь дае магчымасць школьнікам прадэманстраваць сваю эрудыцыю, знаходлівасць, ініцыятыўнасць, кемлівасць. І таму вельмі прыемна, што сярод удзельнікаў гэтай гульні былі і вучні нашай школы. Яшчэ ў снежні васьмікласнікі Марыя Бізунова і Павел Кудрэвіч разам са сваімі класнымі кіраўнікамі і бацькамі адправіліся на здымачную пляцоўку, якая размясцілася ў Палацы спорту ў Мінску.
Тэлевізійный клас уразіў не толькі вучняў, але і дарослых. Хітрыя канструкцыі, здольныя фіксаваць долі секунды, на якія можа адрознівацца хуткасць пошуку правільнага адказу.Толькі дзяцей здымалі шэсць камер у студыі.
На пляцоўцы адзін на адзін з вучнямі знаходзіўся Георгій Калдун – вядучы, які змог знайсці падыход да кожнага ўдзельніка. Размаўляючы з вучнямі, ён даў зразумець, што ўдзел і нават перамога ў шоу не дапаможа паступіць у ВНУ, але, дзякуючы гульні, вучні маюць шанс прадставіць сябе і свае веды на рэспубліканскім узроўні. Аўтары праекта падрыхтавалі займальныя і крэатыўныя заданні, для выканання якіх удзельнікам спатрэбіліся не толькі выдатныя веды школьнай праграмы, але і агульнае развіццё, здольнасць арыентавацца ў розных галінах навукі, вытрымка і нават хуткасць.
Свае меркаванні аб удзеле ў гульні вучні выказвалі ў час інтэрвью з Дзмітрыем Новік – другім вядучым, які чакаў удзельнікаў пасля кожнага туру ў “настаўніцкай”. З яго рук вучні атрымлівалі дыпломы, салодкія прызы і падарункі.
Было шмат эмоцый: хваляванне, радасць, здзіўленне, сум. Затрачаны час, але ўсё на карысць. На карысць вучням, якія ўжо па дарозе дадому марылі зноў вярнуцца на здымачную пляцоўку.
Каб патрымаць у прыемным напружанні гледачоў і захаваць інтрыгу, пра вынікі прамаўчу, скажу толькі Марыі і Паўлу, што яны вялікія малайцы. А пераканацца ў гэтым можна будзе ўсім літаральна праз тыдзень, у час паказу перадачы з удзелам васьмі-класнікаў.
І ў працяг. Нічога не атрымалася б без бацькоў. Дзякуючы Аляксандру Уладзіміравічу Бізунову, мы своечасова і хутка пры-ехалі ў Мінск. А падрымка матулі кожнаму чалавеку патрэбна ў любой жыццёвай сітуацыі. За гэта, а таксама за ўзаемапаразуменне, тактоўнасць, магчымасць прыйсці на дапамогу, не лічачы ўласнага часу, словы падзякі Ірыне Аляксандраўне Бізуновай і Наталлі Рыгораўне Кудрэвіч.
Святлана Шакура, настаўнік беларускай мовы і літаратуры ДУА “Сярэдняя школа №2 г.Круглае”.