Успомнілі дзедавы звычаі, успомнілі даўніну

Каб быць сапраўдным патрыётам сваёй краіны, трэба змалку ведаць і шанаваць духоўную спадчыну свайго народа, роднай і мілай сэрцу старонкі. Прыгадаць старадаўнія традыцыі нашых продкаў і нават на пэўны час акунуцца ў атмасферу тых далёкіх і добрых часоў дапамог раённы этнаграфічна-фальклорны фестываль “Тутэйшыя”, які арганізавалі і правялі ў Круглянскім раённым цэнтры творчасці дзяцей і моладзі “Вясёлка”.

У выніку атрымалася сапраўднае каларытнае народнае свята, прысвячанае Году малой радзімы. Вельмі прыемна было назіраць за ўдзельнікамі фестывалю (дарэчы, гэта – навучэнцы школ Круглянскага раёна) у прыгожых нацыянальных касцюмах, вяночках ды вышыванках, бачыць за іх шчырымі ўсмешкамі ледзьве прыкметныя ноты хвалявання.

 

Пачэснае першае месца заняў калектыў Кручанскага НПК, “серабро” фестывалю прысуджана вучням Рубежскага НПК, “бронза” – рабятам з Цяцерынскага НПК. Але без дыпломаў і падарункаў не засталася ні адна з творчых каманд: дыпломамі ў намінацыях “Народная песня” і “Народная кухня ” ўзнагароджаны калектывы СШ №2 і СШ №1, а ў намінацыі “Сцэнічная праграма” – рабяты з Комсеніцкага і Філатаўскага НПК.

Вялікі дзякуй выказалі пад час узнагароджання ўсім удзельнікам фальклорнага свята старшыня раённай арганізацыі ДГА “Белая Русь” Вііа Гапаева і дырэктар КРЦТДіМ “Вясёлка” Таццяна Трэбушэўская, падкрэсліўшы, што падобныя мерапрыемствы сапраўды дапамагаюць адчуць непарыўную сувязь са светлымі і каштоўнымі здабыткамі мінулага, памнажаюць пачуццё еднасці, цікавасць да культуры і гісторыі роднага краю, дапамагаюць захоўваць і аднаўляць традыцыі і звычаі нашых паважаных продкаў. Бо, як сказала Таццяна Леанідаўна, падводзячы вынікі раённага фестывалю “Тутэйшыя”, каб зрабіць верны крок наперад, трэба часцей азірацца назад на свае вытокі, на свае глыбокія карані.
Марына ПАДГАЕЦ.