Непаўторнымі фарбамі зноў зайграў фестываль

Сваімі непаўторнымі фарбамі цёплай летняй парой вось ужо чацвёрты год запар вабіць да сябе на Кругляншчыну міжрэгіянальны фестываль-конкурс «Свята лялькі». За гэты параўнальна невялікі тэрмін ён паспеў стаць своеасаблівай візітнай карткай нашага краю. Прычым, колькасць гасцей з цягам часу прыкметна памнажаецца, што красамоўна сведчыць аб цікаўнасці да таямніц народнай творчасці, аб змястоўнасці, маштабнасці і папулярнасці мерапрыемства.

Сёлетняе свята аб’яднала пад сваім крылом 48 удзельнікаў з розных куткоў Магілёўскай вобласці: з Чавускага, Дрыбінскага, Бялыніцкага, Быхаўскага, Шклоўскага, Магілёўскага і Круглянскага раёнаў.
На ўрачыстым адкрыцці «Свята лялькі-2019» шчыра вітаў усіх прысутных начальнік аддзела ідэалагічнай работы, культуры і па справах моладзі Круглянскага райвыканкама Сяргей Лазоўскі, выказаўшы словы асаблівай падзякі нашым паважаным суседзям з іншых рэгіёнаў, якія прыехалі на фестываль у такім шматлікім і прыгожым складзе.
Насычаная праграма дадзенага мерапрыемства ўключала ў сябе выставу лялек конкурснага праекта, конкурс-прэзентацыю народнай творчасці «Лялька-2019» і конкурсныя выступленні калектываў мастацкай самадзейнасці «Прыдруцкія галасы». Ліліся па-над Друццю цудоўныя песні ў выкананні лепшых вакальных калектываў Магілёўшчыны, змяняючыся чарадой цікавых прэзентацый непаўторных аўтарскіх лялек. Дарэчы, увазе журы і гледачоў прадстаўляліся настолькі разнастайныя лялькі, што і сапраўды ні ў казцы сказаць, ні пяром апісаць: Беларус і Беларусачка з васільковымі вачыма, Клоўн і Клаўнэса, Птушка-радасць і Бусляня, прынцэсы, папялушкі, феі, чароўныя незнаёмкі, абрадавыя і былінныя лялькі, лялькі-абярэгі (Анёл, Зернавушка, Каляда, Купаліч з Купалінкай, Вужыны цар і інш.). На поўны пералік, паверце, не хопіць і ўсёй газетнай старонкі. Прапаноўваліся таксама і ўнікальныя аксэсуары для іх. Напрыклад, цудоўная плеценая калыска, а таксама арыгінальнае адзенне і ўборы, і іншыя элементы, дапаўняючыя вобразы.
Дыпломы пераможцаў ў намінацыі «Песні над Друццю» па выніках агляду-конкурсу мастацкай самадзейнасці атрымалі: народны ансамбль «Дняпроўскія зоры» (Быхаўскі раён), вакальны квартэт «Рапсодыя» (Чавускі РЦКіД), за-служаны народны ансамбль народнай песні «Вячоркі» (Магілёўскі раён), народны ансамбль песні «Жніво» (Бялыніцкі раён), вакальны ансамбль «Сударушка», народны ансамбль народнай песні «Вераснянка» і хор ветэранаў працы «Надзея» (Круглянскі РДК), народны вакальны ансамбль «Беларусачка» (Цяцерынскі СЦК), народны вакальны ансамбль «Калинушка» (Комсеніцкі СДК), вакальны ансамбль «Мілавіца» (Філатаўскі СДК).
Дыпломамі І ступеняў адзначаны: Ларыса Лямцава і Ірына Саўкіна (Круглянскі Дом рамёстваў, намінацыі «Традыцыйная лялька» і «Міфы і легенды роднага краю»), Ірына Грамыка (арт-студыя «Каламбіна», г. Магілёў, намінацыя «Сучасная лялька»), Вольга Мароз (г. Магілёў, намінацыя «Лепшая лялька»), Кацярына Гусцік (СШ №1 г. Круглае, «Самая крэатыўная лялька»), Шапялевіцкі клуб-бібліятэка («Мая любімая лялька»), Шклоўская раённая бібліятэка («Міфы і легенды роднага краю»). Шэрагу канкурсантаў уручаны дыпломы ІІ, ІІІ ступеняў і дыпломы ўдзельнікаў. Усіх прызёраў чакалі таксама памятныя сувеніры «Свята лялькі».

Марына ПАДГАЕЦ.