Для ўсіх – роўныя магчымасці

“Аб некаторых арганізацыйных пытаннях па падрыхтоўцы і правядзенню выбараў дэпутатаў Палаты прадстаўнікоў Нацыянальнага сходу Рэспублікі Беларусь сёмага склікання” – такой была асноўная тэма абласнога семінара-нарады, што прайшоў у Магілёве 10 верасня. На яго запрашаліся старшыні і сакратары акруговых выбарчых камісій, прадстаўнікі мясцовых выканаўчых і заканадаўчых органаў, кіраўнікі сродкаў масавай інфармацыі.
У складзе прадстаўнічага прэзідыума на гэты раз былі старшыня Цэнтрвыбаркама Лідзія Ярмошына, старшыня абласнога Савета дэпутатаў Дзмітрый Харытончык, намеснік старшыні абласнога выканаўчага камітэта Валерый Малашка, старшыня абласной выбарчай камісіі Валерый Берастаў.

Як зазначыла Лідзія Ярмошына, Цэнтральная выбарчая камісія традыцыйна пасля назначэння выбараў праводзіць падобныя тэматычныя семінары ў абласных цэнтрах краіны. Сёлетнія сустрэчы пачынаюцца менавіта з Магілёва.
Па словах Лідзіі Міхайлаўны, на даны момант сістэма правядзення выбараў адладжана поўнасцю. Заканадаўства не менялася ўжо на працягу некалькіх гадоў. Тым не менш, правапрымяняльная практыка пастаянна ўдасканальваецца. Цэнтрвыбаркамам улічваецца пазітыўны і негатыўны вопыт, які пастаянна выкарыстоўваецца яго супрацоўнікамі ў рознага роду тлумачэннях, што і дапамагае ў рабоце выбарчым камісіям. У Цэнтрвыбаркаме працуюць высокакваліфікаваныя юрысты, якія заўсёды дадуць правільныя тлумачэнні, абапіраючыся на Закон.
“У сёлетнюю выбарчую кампанію ЦВК удзеліць асаблівую ўвагу стварэнню належных умоў для галасавання людзей з абмежаванымі фізічнымі магчымасцямі, так як Рэспубліка Беларусь прытрымліваецца Канвенцыі ААН аб правах інвалідаў, – адзначыла Лідзія Ярмошына. – На пасяджэнні 24 верасня ў Цэнтрвыбаркаме будзе заслухана пытанне аб прадастаўленні, рэалізацыі выбарчага права грамадзянам з абмежаванымі фізічнымі магчымасцямі. Раёны дадуць справаздачу аб тым, у якіх месцах размешчаны выбарчыя ўчасткі. Максімальная ўвага будзе ўдзелена стварэнню там безбар’ернага асяроддзя”.
Старшыня Цэнтрвыбаркама паведаміла, што для інвалідаў-калясачнікаў, якія прымуць рашэнне галасаваць непасрэдна на выбарчых участках, а не на даму, як раней, будуць абсталяваны спецыяльныя месцы для галасавання (або чалавек будзе мець магчымасць заехаць у кабіну для галасавання, або побач з камісіяй будзе абсталяваны спецыяльны стол з выгароджваннем). Як і ў папярэднія разы, важна будзе прадугледзіць наяўнасць трафарэтаў для самастойнага галасавання сляпых грамадзян і лупы – для тых, хто мае слабы зрок.
Ёсць дамоўленасць з тэлекампаніямі аб суправаджэнні на экране выступленняў кандыдатаў у дэпутаты сурдаперакладам або субтытраваннем, каб тэксты маглі прачытаць людзі з парушэннямі слыху.
Лідзія Ярмошына расказала яшчэ аб адной навінцы выбарчай кампаніі-2019 – валанцёрамі БРСМ распрацаваны спецыяльны дадатак да мабільных тэлефонаў, з дапамогай якога можна будзе атрымаць розныя звесткі. Праўда, пачне дзейнічаць ён толькі за 60 дзён да выбараў.
Асобы акцэнт у сваім выступленні старшыня Цэнтрвыбаркама зрабіла таксама яшчэ на некалькіх момантах – правядзенні рэгістрацыі ініцыятыўных груп, перадвыбарчай агітацыі, узаемадзеянню з назіральнікамі і сродкамі масавай інфармацыі.
Звернута таксама ўвага прадстаўнікоў мясцовых уладаў, што з 9 верасня пачаўся таксама перыяд вылучэння кандыдатаў у Савет Рэспублікі. Аднак вылучаюць кандыдатуры не грамадзяне, а выканаўчыя камітэты і Саветы базавага ўзроўню на сумесных пасяджэннях.
У канцы семінара-нарады Лідзія Міхайлаўна адказала на тыя пытанні, якія цікавілі ўдзельнікаў мерапрыемства. Дарэчы, на асобых з выбарчых участкаў апрача выбараў у парламент будуць арганізаваны і давыбары дэпутатаў у мясцовыя Саветы дэпутатаў. Але тут варта будзе загадзя патлумачыць грамадзянам аб гэтай дзеі. Для давыбараў складаюцца дадатковыя спісы выбаршчыкаў.
Аляксандр ПАЎЛАЎ.