Колішні сквер каля кафе “Верасок” сёння ўжо не пазнаць. Тут актыўна вядуцца работы па яго “амаладжэнню”. А першым афіцыйна здадзеным аб’ектам стала летняя танцавальная пляцоўка, што размешчана ў вельмі жывапісным месцы – паміж скверам і рэчкай Друць.

На мерапрыемства сабралася шмат гасцей – прадстаўнікоў тых арганізацый, хто дапамагаў і падтрымліваў ініцыятараў гэтага добрага пачынання, а таксама некалькі сотняў дзяцей.

Усіх прысутных цёпла павітаў непасрэдна старшыня райвыканкама Сцяпан Палоннікаў. Ён выказаў шчырую падзяку тым калектывам, грамадскім арганізацыям, мясцовай моладзі, хто прымае актыўны ўдзел у добраўпарадкаванні прыцягальнага куточка нашай малой радзімы. Дарэчы, на добраўпарадкаванне сквера скарыстана і частка сродкаў, якія былі зароблены круглянамі на раённым суботніку. А саміх рабят Сцяпан Іванавіч павіншаваў з Міжнародным днём абароны дзяцей і пажадаў ім цудоўных летніх канікул і добрага адпачынку.

Шчыра павіншаваў са святам мясцовую дзятву і старшыня раённага Савета дэпутатаў Сяргей Храмцоў. Ён звярнуўся таксама да моладзі з просьбай захаваць на многія гады тое, што мы ствараем сёння разам.

Ад імя маладога пакалення круглян вялікую падзяку за знакавы падарунак выказала ў адрас кіраўнікоў раёна член дзіцячага парламента, вучаніца Валянціна Коваль.

…Танцавальная пляцоўка – важны аб’ект культуры для карыснага баўлення вольнага часу. Задумак па выкарыстанню абноўленай летняй пляцоўкі ў Круглым вельмі шмат. Гэта правядзенне розных мерапрыемстваў для моладзі і школьнікаў, арганізацыя вечароў-адпачынкаў для “тых каму за…”, музычныя вечары, гадзіны паэзіі, класічнай музыкі, а таксама многае іншае.

Прыйшло лета, а з ім і доўгачаканыя канікулы. У цэнтры асаблівай увагі дарослых павінна стаць бяспека нашых дзяцей. Аб гэтым пастаянна напамінаюць і работнікі МНС. Вось і ў рамках рэспубліканскай патрыятычнай акцыі “Не пакідайце дзяцей адных” з 3 па 24 мая ў Круглянскім раёне прайшоў агляд-конкурс “Я ў выратавальнікі пайшоў бы”. Пераможцамі конкурсу ў намінацыі “Дзіцячы касцюм выратавальніка” сталі: выхаванцы дзіцячых ясляў-садоў №3 і №1 Уладзіслаў Марозаў і Дар’я Шумская, а таксама навучэнка сярэдняй школы №1 Варвара Какойчанка.

Адпаведныя дыпломы і каштоўныя падарункі ім уручылі начальнік Круглянскага аддзела па надзвычайных сітуацыях Сяргей Шчытнікаў, дырэктар прадстаўніцтва Рэспубліканскага УСП “Белдзяржстрах” па Круглянскаму раёну Людміла Драздоўская і першы сакратар раённага камітэта ГТ “БРСМ” Вікторыя Спічакова.

Завяршылася мерапрыемства вялікай святочнай дзеяй, падрыхтаванай для дзяцей работнікамі культуры.

* * *

Ні для каго не сакрэт, што менавіта скверы і паркі ў любым горадзе, у любым іншым населеным пункце з’яўляюцца вытворцамі чыстага паветра. Нарэшце, у іх зацені мы камфортна адчуваем сябе ў летнюю спёку, ды і ў зімовы час тут ёсць магчымасць рабіць няспешныя прагулкі па так званых сцяжынках здароўя. Адным словам, там, дзе жыве чалавек, заўсёды былі і будуць пасаджаны дрэвы – нашы спрадвечныя спадарожнікі. Кітайская мудрасць сцвярджае: “Лепшы час, каб пасадзіць дрэва, быў дваццаць гадоў назад. Наступны лепшы час – сёння”.

Нашы далёкія і блізкія нашчадкі падаравалі нам нямала знакавых насаджэнняў: тыя ж сосны паабапал цэнтральнай вуліцы ад мікрараёна бальніцы і далей у бок Талачына – жывыя сведкі яшчэ царскіх Кацярынінскіх часоў. Сённяшні цэнтральны парк культуры і адпачынку закладваўся ў гонар вельмі знамянальнай савецкай даты – 50-годдзя Беларускай Савецкай Сацыялістычнай Рэспублікі. Так ён некалі і называўся – “Парк 50 год БССР”. А яшчэ казалі, што з вышыні птушынага палёту можна было прачытаць словы “50 год”, высаджаныя з вечназялёных дрэваў.

Нельга дакладна ўстанавіць, калі і з якой нагоды закладваўся ў Круглым яшчэ адзін знакавы сквер – насупраць пачатку вуліцы Магілёўская. Хутчэй за ўсё гэта быў 1952 год – так сцвярджаюць мясцовыя старажылы. У такім выпадку гэту падзею можна прымеркаваць да 30-годдзя стварэння Саюза Савецкіх Сацыялістычных Рэспублік. Але пакінем у спакоі палітыку. На першае месца паставім выгоды і зручнасці.

Міні-парк, зразумела, рэгулярна паднаўляўся маладымі дрэвамі, пакуль не адбылася іх поўная замена.

Сквер пастаянна прыцягваў сюды шматлікіх наведвальнікаў. Гэту акалічнасць скарыстоўвалі ў свае часы розныя ведамасныя структуры: была пабудавана танцавальная пляцоўка – круг з дашчатым насцілам, потым там з’явіўся і гандлёвы ларок. Але аб тым ужо помняць толькі асобныя кругляне. Куды свяжэй ва ўспамінах падзея канца 90-х, калі тагачаснае кіраўніцтва райвыканкама ініцыіравала і арганізавала добраўпарадкаванне гэтага прыцягальнага месца. Тады з’явілася вялікая цэментаваная лесвіца-спуск да самай Друці. Унізе, да радасці мясцовай моладзі, была пабудавана новая летняя танцавальная пляцоўка.

У сілу пэўных абставін праз некалькі гадоў даны аб’ект аказаўся незапатрабаваным. Звярнуць зноў увагу на яго папрасілі члены маладзёжнага парламента непасрэдна ў кіраўнікоў раёна падчас работы адной з сесій раённага Савета дэпутатаў. І старшыня райвыканкама Сцяпан Палоннікаў, і старшыня райсавета дэпутатаў Сяргей Храмцоў ініцыятыву рабят усхвалілі і падтрымалі.

Праўда, добрая ідэя знайшла больш шырокае ўвасабленне. Парк стане яшчэ адным прыцягальным месцам адпачынку, прычым, з гістарычным ухілам. Некалькі тыдняў назад тут пачаліся работы як па добраўпарадкаванню асноўнай тэрыторыі, рэканструкцыі і рамонце ўжо існуючых інфраструктурных аб’ектаў да ўстаноўкі новых знакавых кампазіцый. Шматлікія прахожыя ўжо звярнулі ўвагу на ўстаноўлены на ўваходзе ў парк вялізны камень-валун, які некалі стаяў на скрыжаванні дзвюх асноўных вуліц у цэнтры Круглага.

З цягам часу, калі Круглае ў канцы 60-х ў чарговы раз стала райцэнтрам, камень “не ўпісаўся” у новае аблічча гарадка, і яго проста спіхнулі з горкі. Там сярод кустоў і травы ён і прызямліўся на доўгія дзесяцігоддзі.

Мясцовая грамадскасць не раз выходзіла з прапановай знайсці гэтаму незвычайнаму валуну больш дастойнае месца. Тым больш, што супраць зносу каменя публічна выступаў пры жыцці і слынны магілёўскі паэт Аляксей Пысін:

“Таму камню тысячагоддзі. Вякамі ён нікому не перашкаджаў. Кожны, хто бываў у Круглым, бачыў гэты камень: і тыя, хто на вайну ішоў, і тыя, хто шлюб спраўляў, і тыя, хто на базар прыязджаў! Валун той – сведка ўсіх падзей мінулага. Ён – гісторыя, ён – помнік!” – горача, усхвалявана гаварыў Аляксей Васільевіч пры сустрэчы з круглянамі. Цяпер можна сказаць і словы ў адказ: мы пачулі вашы пажаданні.

Нельга не заўважыць у абнаўляемым скверы і новую кампазіцыю з сучасных матэрыялаў “Я люблю Круглае”.

Прывабліваюць наведвальникаў парка ўжо і ўсталяваныя зручныя лавачкі. Зроблена падсадка вечназялёных дрэўцаў уздоўж бетанаванай лесвіцы.

Не хочацца раскрываць усіх сакрэтаў, але ў бліжэйшых планах арганізатараў устанавіць уздоўж круглянскай лесвіцы-спуску да ракі Друць яшчэ і некалькі білбордаў, дзе цераз фота і кароткія тэкставыя матэрыялы будзе адлюстраваны экскурс у гісторыю роднага краю.

Кругляншчына – адзін з самых прыгожых куткоў беларускай зямлі. Шчодрая і ўрадлівая зямля, багатая лясамі і рэкамі, азёрамі і крыніцамі, працалюбівымі і ветлівымі людзьмі, што завецца Прыдруцкім краем, мае сваю адметную гісторыю, культуру і традыцыі. Народная мудрасць сцвярджае: “Па-сапраўднаму жыве той чалавек, хто помніць сваё мінулае”. Мы павінны захаваць і прымножыць славу прадзедаў, дзядоў і бацькоў, усведамляючы пры гэтым, што светлае будучае ствараецца тут і зараз.

Афіцыйнае адкрыццё ўсяго адноўленага парка адбудзецца 28 чэрвеня – у дзень вызвалення раёна ад нямецка-фашысцкіх захопнікаў.

Аляксандр ПАЎЛАЎ.

Фота аўтара.