Распачынаем свой расказ пра дзiвоснае творчае захапленне – выцiнанку, якой займаецца Іна Салаўёва, супрацоўнік раённага цэнтра сацыяльнага абслугоўвання насельніцтва, таму, што менавiта яно так i цягне да сябе таго, хто хоць разок пабачыў той цуд, што адтрымоўваецца звычайным выкарыстаннем нажнiц ды паперы.

Яшчэ з пачатку 1999 года, калi толькi пачынаў сваю працу Дом рамёстваў у Круглым, маладой таленавiтай жанчыне Iне Салаўёвай прапанавалi вывучыць такi цiкавы i мала каму вядомы накiрунак творчасцi, як выцiнанка. У той час яна працавала ў раённай бiблiятэцы мастаком афармiцелем. А былы кiраўнiк аддзела культуры Людмiла Суперфiн прапанавала паспрабаваць сябе менавiта ў гэтым напрамку. За што сёння ёй i асаблiвая падзяка ад майстра Iны Салаўёвай. Бо ў той час яна не вельмi добра ведала, што ж гэта за такое – выцiнанка.
Па падручнiках i часопісах, па кароткiх замалёўках, дзякуючы сваёй фантазii i творчай натуры, яна навучылася гэтаму рамяству. Адразу ў жанчыны i атрымалася не толькi прадэманстраваць набытыя веды, але i атрымаць прызнанне на першым конкурсе рэспублiканскага ўзроўня пад назвай «Ажурныя фантазii». Аб iм i аб поспеху маладой майстрыхі пiсалi нават у часопісе «Культура i мастацтва». Ужо потым былі iншыя конкурсы, дзе таксама Iна Салаўёва заяўляла аб сабе, як аб таленавiтым i цікавым мастаку. Аж у снах ёй з’яўлялiся вобразы тых незвычайных узораў, якiя потым жанчына i ажыццяўляла ў сваiх тварэннях.
Творчасць Іны Салаўёвай была заўжды побач з ёй. Яшчэ са школы яна добра малявала. Таму, калi стала пытанне выбару прафесii, не задумваючыся, пайшла вучыцца ў Бабруйскае мастацкае вучылiшча. А пасля яго заканчэння прыехала на малую радзіму ў Круглае, дзе i распачала свой дарослы шлях ў мясцовым РДК. Потым працавала ў школе настаўнiцай малявання, мастаком у бiблiятэцы. Сёння яна працуе у РЦСАН на дзённым аддзяленні знаходжання для iнвалiдаў і грамадзян пажылога ўзросту. Арт-тэрапiя для iнвалiдаў – яе работа. А яшчэ пры мясцовай царкве вядзе гурток нетрадыцыйнага малявання для дзяцей 3-5 гадоў. Усюду Іна працягвае ажыццяўляць свае творчыя мары ў работах з паперай i іншымі матэрыяламі, фарбамi i шклом. Прывучаючы з дапамогай сваiх ведаў людзей з абмежаванымі магчымасцямі, яна прапануе iм паспрабаваць сябе i ў выцiнанцы. Захапiла гэтага чалавека творчая хваля жыцця назаўжды, таму i работы яе такiя незвычайныя i непаўторныя.

Святлана ШУТ.