Супрацоўнікі цэнтральнай бібліятэкі арганізавалі для сяброў клуба “Сустрэчы” выязную экскурсію ў аграгарадок Комсенічы.
Мерапрыемства, прысвечанае яго 15-годдзю, прайшло пад мілагучнай назвай “Мой край – мая гісторыя жывая”.

Здаецца, яшчэ зусім нядаўна ўваходзілі ў жыццё вяскоўцаў такія паняцці, як аграгарадок, а ўжо пятнаццаць гадоў мінула. І за гэты час дасягнута і зроблена нямала. Сяло пачало жыць і працаваць па-новаму.
А гісторыя сваімі каранямі ахоплівае шмат большы адрэзак часу, усё тое, што звязана з вёскай Комсенічы і Комсеніцкім сельскім Саветам на працягу многіх гадоў.
Гасцей тут чакалі. У фае мясцовага СДК іх сустракалі з караваем і песнямі бібліятэкар Наталля Пановіч і вакальны ансамбль “Калинушка”.
Потым “дэлегацыю” запрасілі ў бібліятэку, дзе Наталля Мікалаеўна пазнаёміла з дзеючымі выставамі, расказала пра гісторыю населенага пункта Комсенічы. А гісторыю ён мае багатую і людзьмі сваімі працавітымі славіцца.
Экскурсанты даведаліся пра знакамітых людзей, якіх узрасціла комсенічская зямля, якія вучыліся ў Комсеніцкай школе.
У 1949 годзе скончыў сямігодку ў Комсенічах Анатоль Бужынскі. Затым вучыўся на хлебапякарным аддзяленні Мінскай школы ФЗВ харчавікоў. У 1950 годзе, атрымаўшы кваліфікацыю цестамеса, быў накіраваны на Мінскі хлебазавод № 2. Анатоль Ануфрыевіч завочна скончыў Маладзечанскі палітэхнікум. У 1960 годзе ён стаў пекарам-майстрам. Брыгада Бужынскага адной з першых на прадпрыемстве асвоіла праектныя магутнасці канвеерных печаў безупыннага дзеяння, наладзіла выпуск шаснаццаці новых сартоў хлебабулачных вырабаў. У 1974 годзе А. Бужынскаму за выкананне планавых заданняў і абавязацельстваў, вялікі ўклад у павышэнне вытворчасці харчовых тавараў прысвоена званне Героя Сацыялістычнай працы. Яго прозвішча было занесена ў кнігу працоўнай славы Мінхарчпрама СССР і ЦК прафсаюза ведамаснай галіны. Узнагароджаны А.Бужынскі таксама ордэнамі Леніна і Працоўнага Чырвонага Сцяга, медалём “За доблесную працу”.
Успомніла Наталля Мікалаеўна і пра дынастыю Шафранскіх, пра якіх грымела слава не толькі ў нашым раёне яшчэ ў 80-гады. У 1973 годзе Вячаслаў Шафранскі узначаліў калгас “Шлях Леніна” і росквіт гэтай гаспадаркі цалкам звязаны з яго імем. Адстаючы калгас ён вывеў у перадавыя, ператварыў у сельгаспрадпрыемства з вялікай культурай земляробства, добрай вытворчай базай і заасфальтаванымі дарогамі. Пры праўленні В.Шафранскага калгас 9 разоў выходзіў у пераможцы Усясаюзнага сацыялістычнага спаборніцтва. А сам кіраўнік быў узнагаро-джаны ордэнам Працоўнага Чырвонага Сцяга, адзначаны граматамі Вярхоўнага Савета БССР. Сёння Вячаслаў Канстанцінавіч – заслужаны ветэран працы, адзін з самых паважаных людзей у аграгарадку Комсенічы і ў раёне.
У вёсцы Кляпінічы Комсенічскага сельскага Савета жыве заслужаны работнік сель-скай гаспадаркі Марыя Арыстава, таксама вельмі паважаны чалавек у вёсцы і ў акрузе. Марыя Трафімаўна шмат гадоў запар была ў ліку лепшых даярак раёна. Двойчы ўдзельнічала ва Ўсесаюзнай выставе дасягненняў народнай гаспадаркі ў Маскве. У 1971 годзе яна атрымала ордэн Працоўнага Чырвонага Сцяга, а ў 1975-м удастоена самай высокай урадавай узнагароды – ордэна Леніна. Працавала Марыя Трафімаўна на ферме ў той час, калі калгас узначальваў Вячаслаў Шафранскі. Простая вясковая жанчына ўдзельнічала як дэлегат у рабоце саюзнага партыйнага з’езда.
Пабывалі госці з Круглага і ў філіяле Дома рамёстваў, дзе пазнаёміліся з творчымі работнікамі, у амбулаторыі, Свята-Андрэеўскай праваслаўнай царкве, Комсеніцкім НПК. І ўсюды іх гасцінна сустракалі. Навучэнцы школы пранікнёна чыталі вершы свайго знакамітага земляка Віктара Лужкоўскага. Паэт – таксама выхадзец з Комсеніч. Нарадзіўся ён у гэтай вёсцы ў 1942 годзе, у самы цяжкі ваенны час. Скончыў Комсеніцкую школу, потым будаўніча-тэхналагічны факультэт Беларускага палітэхнічнага інстытута. Працаваў на будоўлях Мінска, быў вядучым інжынерам сталічнага мотавелазавода. І пісаў вершы. Шчырыя, ад душы, многія з якіх прысвяціў сваім землякам.
Дзякуючы свайму таленту вясковы хлопец пакарыў творчы алімп – стаў членам Саюза пісьменнікаў Беларусі. Адзін час працаваў нават дырэктарам Дома літаратара.
Землякі любяць і цэняць творчасць паэта.
Цікавай і насычанай аказалася паездка ў аграгарадок Комсенічы для сяброў клуба “Сустрэчы”, ветэранаў працы з г. Круглае. Яны шчыра дзякавалі арганізатарам паездкі, бібліятэкарам аддзела абслугоўвання і інфармацыі цэнтральнай раённай бібліятэкі Галіне Гарцуевай, Наталлі Салтанавай, бібліятэкару Комсеніцкай сельскай бібліятэкі Наталлі Пановіч, дырэктару Комсеніцкага НПК Ліліі Учаевай, спецыялісту па сацыяльнай рабоце сацыяльнага пункта аграгарадка Комсенічы Таццяне Сенакосавай, а таксама удзельнікам вакальнага ансамбля “Калинушка”, якія падрыхтавалі міні-канцэрт.
Наперадзе яшчэ шмат важных дат, паездак і сустрэч. У добры шлях!
Святлана Варапаева.