Праводзіць калядкі на святочным тыдні ў нашым дзіцячым садзе стала добрай традыцыяй. Мэта мерапрыемства – пазнаёміць выхаванцаў з абрадам калядавання ў Беларусі, выхаваць цікавасць да культурных традыцый беларускага народа.

У музычнай зале пераапранутыя артысты, дарослыя і дзеці разыгралі сапраўдны спектакль.  «Калядоўшчыкі»  прыйшлі з песнямі і калядкамі. Яны пагасцілі ў ветлівай гаспадыні, пагулялі з Казой, паплясалі з Мядзведзем, слухалі калядныя песні, вадзілі карагоды, распавядалі вясёлыя беларускія пацешкі і лічылкі. Па старай беларускай традыцыі гаспадыня навучыла дзяцей гадаць: пад абрус пакласці салому, загадаць жаданне і выцягнуць саломінку, калі яна кароткая – жаданне хутка збудзецца, а калі доўгая – яшчэ доўга прыйдзецца чакаць, каб яно споўнілася. Дзяўчынкі і хлопчыкі з задавальненнем загадвалі жаданні і варажылі. Да гасціннай гаспадыні «заляцела»  і ведзьмачка-прыгажуня, якая прапанавала пагуляць з яе чароўным памялом. У канцы мерапрыемства ўсе ўдзельнікі весела танцавалі агульны танец «Весялуха».

Удзел у народных святах не толькі прыносіць радасць маленькім выхаванцам, але і дазваляе ім дакрануцца да традыцый і звычаяў свайго народа, адчуць усё хараство народных святаў і гулянняў.

Галіна Атрашкевіч, намеснік загадчыка па асноўнай дзейнасці ДУА «Дзіцячы сад № 2 г. Круглае».