ПРАСУЕ Ў РУЛОНЫ… ЛЕТА
Пусцеюць палеткі, і разам з уборкай саломы адыходзіць ад нас лета і яшчэ адно залатое жніво. Цяпер, як калісьці, салому не стагуюць, а прасуюць у рулоны, якія зручна звазіць з поля і захоўваць.
Ціхім жнівеньскім днём аўтар гэтых радкоў разам з галоўным аграномам КСУП “Круглянскі-Агра” Міхаілам Сербунам пабывала ў полі за вёскай Шаўкавінне, дзе на прасоўцы саломы заняты адзін з лепшых механізатараў сельгаспрадпрыемства Сяргей Верам’ёў. На трактары МТЗ-3022 з прэс-падборшчыкам-абмотчыкам рулонаў “Тарнада” ён з рання і да пазна ў полі. Якраз быў час абеду, і галоўны аграном падвёз механізатару гарачае падмацаванне. На гэтым аддаленым полі Сяргей Верам’ёў “змагаецца” адзін, а кіраўніцтва гаспадаркі з ім увесь дзень падтрымлівае мабільную сувязь. Камбайны абмалацілі ячмень, пакінуўшы роўныя залацістыя валкі і перамясціліся на другі ўчастак. Камбайнерам зараз не да адпачынку.
– Галоўнае, не ўпусціць час, пакуль стаіць сухое надвор’е, – патлумачыў Міхаіл Арцёмавіч, падняўшы з валка жменю рассыпной саломы, – спрасаваць салому ўслед за абмалотам.
Якасная ячменная салома з гэтага поля таксама пойдзе на корм жывёле.
Сяргей спыніў трактар на ўскрайку поля і заглушыў матор. Спачатку ён гутарыў аб справах з галоўным аграномам, а потым казаў і мне, што хоць і нялёгкая місія – працаваць у сельскай гаспадарцы, але работу сваю ён любіць і мяняць у жыцці нічога не збіраецца.
– Я ў гэтай гаспадарцы працую 4 гады, – працягваў ён размову, – правы механізатара атрымаў яшчэ ў НПК, калі вучыўся ў старэйшых класах Круглянскай школы. Потым была служба ў Арміі, у аўтамабільных войсках у Печах. Адслужыўшы, працаваў на Круглянскім ільнозаводзе. А потым перайшоў сюды, у сельгаспрадпрыемства, дзе ёсць стабільнасць і някепскі заробак. Спачатку даверылі мне МТЗ-1221, а потым перасеў на МТЗ-3022. І ў гэтым годзе з ранняй вясны быў заняты на дыскаванні глебы, а калі пачалася нарыхтоўка кармоў, памяняў плугі на прэс-падборшчык.
Пакуль не пачалося жніво, удзельнічаў у нарыхтоўцы прасаванага сена – спрасаваў 999 тон якаснага травянога корму.
Цяпер на яго ліку 2200 тон прасаванай саломы і 120 тон сенажу ў палімернай плёнцы.
Працягваецца жніво, працягваецца і нарыхтоўка кармоў, прыкладваецца старанне, каб у час зімова-стойлавага перыяду кармавы стол быў разнастайны, а кармы якаснымі.
У полі працуюць усе зладжана, у адным звяне, на агульны вынік.
Святлана Варапаева.