Кожнае лета мы выбіраем на карце Беларусі якое-небудзь цікавае месца і адпраўляемся ў дарогу. На гэты раз выбар паў на вёску Бычкі Ушацкага раёна Віцебскай вобласці. Захацелася пабываць на радзіме вядомага беларускага пісьменніка Васіля Быкава. Тым больш, што ў гэтым годзе 19 чэрвеня яму спаўнялася 95 гадоў з дня нараджэння.

Ад суседняга з Круглым Талачына да г.п. Ушачы сто пяцьдзясят кіламетраў, дарога няблізкая, але колькі цікавых месц ад Віцебскай вобласці мы праязджаем. І ў кожным з іх хочацца спыніцца. На нашым шляху адзін з прыгажэйшых гарадоў Віцебшчыны – Лепель. Азёрны край. Ён размешчаны на адным з буйнейшых азёр вобласці.

Асноўная славутасць горада – касцёл Святога Казіміра, які быў перабудаваны ў 1876 годзе. Гэта архітэктурны помнік 19-га стагоддзя. Па жаданню ў Лепелі можна наведаць і раённы краязнаўчы музей, дзе яго супрацоўнікі шмат пакажуць і раскажуць аб гісторыі горада і раёна.

А ад Ушач да Бычкоў, дзе размешчаны сядзіба-музей пісьменніка Васіля Быкава, які з’яўляецца філіялам Ушацкага музея народнай Славы імя Героя Савецкага Саюза Уладзіміра Лабанка – трэба праехаць яшчэ дваццаць кіламетраў.

І вось, нарэшце, мы зусім блізка ад вёскі Бычкі. Па гэтай дарозе часта вяртаўся дадому ў родную вёску вялікі пісьменнік. Там ён адпачываў душою. Па словах яго роднага пляменніка Мікалая Харака, які цяпер стаў дазорцам сядзібы-музея, Васіль Уладзіміравіч, калі прыязджаў на адпачынак, абавязкова адпраўляўся на мясцовае возера пакатацца на чоўне. Роднае возера ён палюбіў з маленства, а ўсю яго прыгажосць і непаўторнасць адчуў тады, калі яшчэ хлапчуком упершыню праплыў на чоўне па азёрнай гладзі.

Падрабязны рэпартаж чытайце на старонках раённай газеты “СЖ” № 52 ад 02.07.2019г.