2014 год, які быў аб’яўлены Годам гасціннасці, адыходзіць у мінулае.

2014 год, які быў аб’яўлены Годам гасціннасці, адыходзіць у мінулае.
–Год гасціннасці прайшоў, а гас-ціннасць у нашай Беларусі існавала спакон вякоў . Умеюць беларусы сустракаць і прывячаць гасцей, і пахваліцца ёсць чым, – гэтымі словамі і пачала ўрок у пятым класе Філатаўскага НПК настаўніца роднай мовы і літаратуры Галіна Іванаўна Матошка. Урок быў прысвечаны апошнім дням адыходзячага Года гасціннасці з мэтай развіцця культурна-маўленчага этыкету, знаёмства з фальклорам, тым багаццем народнай творчасці, якое вякамі збіралі нашы продкі.
Беларуская мова – гэта тое, што яднае нас і робіць адной нацыяй. Словы маўленчага этыкету – вітанні, пажаданні, развітанні, своеасаблівыя кампліменты – гэта яшчэ адно багацце беларускай мовы, народнай творчасці, традыцыі паказу гасціннасці і добразычлівасці людзей. Ёсць і неабходная частка традыцыі – вітаць ганаровых гасцей хлебам-соллю.
На ўроку дзеці вучыліся, якія і калі кампліменты можна казаць людзям. Вучыліся таксама пісаць віншаванні на паштоўках, пажаданні сваім блізкім. Было дадзена вучням заданне сабраць ад сваіх дзядуль, бабуль прыгаворкі, прымаўкі, кампліменты.
–З гэтага для дзяцей і павінен адкрывацца больш шырока свет народнай творчасці, — казала настаўніца. – Яны павінны ведаць традыцыі продкаў і зберагаць іх, каб выкарыстоўваць у жыцці, перадаваць з пакалення ў пакаленне.
Мы, беларусы, гасціннымі будзем заўсёды.
С. ВАРАПАЕВА.