Будзем з хлебам!
У гэтым упэўнены адзін з лепшых механізатараў СВК “Круглянскі Рассвет” Віталь Таланаў. І ў яго ёсць усе падставы для такога птымістычнага запэўнівання.
У гэтым упэўнены адзін з лепшых механізатараў СВК “Круглянскі Рассвет” Віталь Таланаў. І ў яго ёсць усе падставы для такога птымістычнага запэўнівання. Нягледзячы на малады ўзрост, Віталь запісаў ужо на свой рахунак не адну пасяўную.
–Такіх шчырых працаўнікоў трэба пашукаць, — кажа пра Таланава намеснік старшыні сельгаспрадпрыемства Валерый Махоркін. – Цягавіты, сапраўдны руплівец, працаўнік, які ўкладвае ў паўсядзённую работу не толькі прафесійнае майстэрства, але і нешта большае, так бы мовіць – часцінку душы. Гэта не ўсім дадзена.
У дзень нашага наведвання Віталь Васільевіч працаваў на палетку, што раскінуўся за вёскай Альшанікі, трактарам Беларус-3022 у агрэгаце з АКПМ-6 сеяў ячмень. Норму выпрацоўкі штодня перавыконвае. Але, як сам кажа, за гектарамі не гоніцца. Галоўнае для механізатара – каб быў ураджай, каб вырас добры хлеб. І ён абавязкова будзе.
— Абласныя “Дажынкі” ж сёлета раён прымае. Гасцей сустракаем, — разважае механізатар. – А гэта ўжо справа гонару.
— Пытанні веснавой пасяўной у на на асаблівым кантролі, — кажа галоўны эканаміст СВК “Круглянскі Рассвет” Валерый Жушма. – Мы стварылі для паспяховай працы механізатараў спрыяльныя ўмовы. Распрацавана і зацверджана даволі неблагая ўмова аплаты. Не шкадуем грошай на харчаванне нашых сейбітаў і аратых. Абеды ў поле прывозім двойчы на дзень. Смачная, каларыйная ежа. Плоцяць за яе ўсяго 10% ад сапраўднага кошту. Штодня на спецыяльным стэндзе, які размешчаны на ўваходзе ў рамонтную майстэрню гаспадаркі, вывешваецца бюлетэнь з інфармацыяй: хто колькі зрабіў і зарабіў за папярэдні дзень. Ведаеце, стымулюе.
Масавая пасяўная кампанія ў СВК “Круглянскі Рассвет” толькі набрала разгон. Але кожны веснавы дзень называе тых, хто вызначаецца ў рабоце высокімі паказчыкамі. У іх ліку — Анатоль Ружанцаў, які на трактары МТЗ-82 з прычэпам ПРТ-7 уносіць арганіку, Іван Сімчанка, задзейнічаны на падрыхтоўцы глебы на энерганасычаным трактары Беларус-3522. Своечасовую падвозку насення ў поле забяспечвае вадзіцель Сяргей Шпілеўскі. Працэсам пратручвання насеннага зерня кіруе аграном-насенневод Сяргей Астроўскі. Засеяна 334 гектары. Усе яны – на рахунку Віталя Таланава. Пакласці зерне ў глебу яшчэ патрэбна не на адной сотні гектараў. Аднак тут цвёрда ўпэўнены ў тым, што адсеюцца ў найлепшыя тэрміны. Інакш ветэран аграрнай «гвардыі» Аркадзь Сімчанка і яго падначаленыя працаваць не могуць. Яны заўсёды нацэлены толькі на поспех.
Ход пасяўной тут, як і паўсюдна ў раёне, штодзённа кантралюецца і спецыялістамі ўпраўлення сельскай гаспадаркі і харчавання райвыканкама.
М. ВАДАП’ЯН.
НА ЗДЫМКУ: трактарыст Віталь Таланаў і першы намеснік начальніка ўпраўлення сельскай гаспадаркі і харчавання райвыканкама Віталь Ласянкоў абмяркоўваюць надзённыя пытанні.
Фота В. Кубека.