Галоўная праца для вучня – вучоба. А добрая вучоба – гэта ўжо гонар не толькі яго аднаго. У сярэдняй школе № 1 г. Круглае, якую многія дзесяцігоддзі ўзначальвае таленавіты педагог і арганізатар А.М.

Галоўная праца для вучня – вучоба. А добрая вучоба – гэта ўжо гонар не толькі яго аднаго. У сярэдняй школе № 1 г. Круглае, якую многія дзесяцігоддзі ўзначальвае таленавіты педагог і арганізатар А.М. Бялянкін, таксама склалася вельмі ўражваючая традыцыя. Штогод тут маштабна і прыгожа на агульнашкольнай лінейцы ўшаноўваюцца лепшыя з лепшых выхаванцаў – пераможцы і прызёры прадметных алімпіяд і разнастайных творчых конкурсаў, прэстыжных спартыўных спаборніцтваў. Напярэдадні новага 2017 года такое свята ладзілася ў самым вялікім памяшканні школы – спартыўнай зале.
Як было зазначана выступаючымі, педкалектыў СШ № 1 знаходзіцца ў Круглянскім раёне ў ліку правафланговых у пытаннях арганізацыі адукацыйнага працэсу. З 2011 па 2015 гады навучэнцамі школы заваявана 5 дыпломаў трэцяга этапу і 3 дыпломы за-ключнага этапу рэспубліканскай алімпіяды па вучэбных прадметах.
У сёлетнім навучальным годзе старт алімпіяднаму спаборніцтву таксама дадзены. У прыватнасці прайшлі ўжо і раённыя баталіі. Вынік у многім прадказальны – на тое яны і вучні школы першай, каб і быць першымі па большасці пазіцый.
Дырэктар А.М. Бялянкін з вялікім задавальненнем аб’явіў: пераможцамі другога этапу рэспубліканскай алімпіяды па вучэбных прадметах, што прайшла ў лістападзе-снежні, сталі аж 20 навучэнцаў школы. Прычым, 12 вучняў узнагароджаны аддзелам адукацыі, спорту і турызму райвыканкама вышэйшай адзнакай — Дыпломамі I ступені. Дыпломамі II і III ступеняў заахвочаны адпаведна пяць і тры юныя дараванні. Пакуль яшчэ не названы ў газетным рэпартажы лідары персанальна, варта адзначыць выдатную работу перш за ўсе такіх настаўнікаў, як А.У. Галаўкоў, выхаванцы якога прынеслі ў агульную скарбонку адразу 5 дыпломаў, Н.М. Самалазавай (4 дыпломы), Н.В. Сімаковай і А.М. Тарба (па 2 дыпломы).
Роль галоўнага персанажу Новага года Аляксандр Міхайлавіч, вядома, не прымяраў, але як святочны чараўнік таксама выступіў — апрача саміх Дыпломаў дырэктар знайшоў магчымасць уручыць пераможцам і прызёрам яшчэ і па каробцы смачных цукерак.
Бясспрэчным лідарам стала вучаніца 11 класа Дар’я Чарняева. У яе адразу аж два Дыпломы I ступені — па англійскай мове і грамадазнаўству. Для дзяўчыны падобныя высокія поспехі не ўпершыню. А таму, як вядома, яшчэ ў лютым рашэннем райвыканкама Д. Чарняевай прысвоена высокае званне “Вучань года”. Сёння яе партрэт змешчаны на раённай Дошцы гонару.
Парадавалі і яшчэ дзве вучаніцы. У прыватнасці, двойчы ўшаноўваліся за першыя і другія месцы Дар’я Афрэмава (матэматыка, руская мова і літаратура), Елізавета Шкіндзерава (гісторыя, грамадазнаўства). Дар’я, дарэчы, адзіная васьмікласніца з гэтай зорнай групы. Усе астатнія – вучні X і XI класаў.
Дыпломамі I ступені ўзнагароджаны таксама Ульяна Абаева (руская мова і літаратура), Кацярына Германьева (гісторыя), Ганна Кулікоўская (руская мова і літаратура), Ілля Леўчанка (фізіка), Кацярына Мінчукова (грамадазнаўства), Юлія Пагода (біялогія), Яніна Пятровіч (хімія), Валерыя Харунжая (беларуская мова і літаратура). Дыпломы II ступені атрымалі з рук дырэктара Марыя Казлоўская (беларуская мова і літаратура), Кацярына Лапыронак (англійская мова), Руслан Латуцін (руская мова і літаратура). Бронзавымі прызёрамі адпаведна сталі Маргарыта Карнеева (руская мова і літаратура), Ксенія Мурашка (грамадазнаўства) і Ірына Французёнак (абслугоўваючая праца).
Цёплыя словы адрасавала ў той дзень кіраўніцтва школы ўсім сваім навучэнцам, іх бацькам і педагогам. Выказана пажаданне дабіцца творчых поспехаў і перамог і ў новым годзе.
Аляксандр ПАЎЛАЎ.