Віталь Крупскі – карэнны магіляўчанін. Чалавек асфальта, калі можна так сказаць. А на сельскагаспадарчую Кругляншчыну трапіў у 1985 годзе, амаль адразу пасля заканчэння Магілёўскага тэхналагічнага інстытута.

Віталь Крупскі – карэнны магіляўчанін. Чалавек асфальта, калі можна так сказаць. А на сельскагаспадарчую Кругляншчыну трапіў у 1985 годзе, амаль адразу пасля заканчэння Магілёўскага тэхналагічнага інстытута.
Малады чалавек ужо тады займаў актыўную жыццёвую пазіцыю. Пэўны час рабіў намеснікам загадчыка аддзела прапаганды і агітацыі райкама партыі.
Вопыт кіраўніка-гаспадарніка набываў на пасадах дырэктара хлебазавода і дырэктара раённай нарыхтоўчай канторы. На той час гэта былі даволі перспектыўныя для нашага рэгіёна прадпрыемствы.
З развалам Савецкага Саюза многія шукалі для сябе больш цёплыя і ўтульныя месцы. А Віталь Валер’евіч нечакана для ўсіх вырашыў падацца ў… фермеры. Скептыкі тады (а ішоў 1998 год) толькі ўсміхаліся: “Куды табе, гараджаніну? Тут і не кожнаму калгаснаму спецыялісту, з практыкай не аднаго года, з такім возам праблемаў не справіцца”.
Справіўся. Хаця падножак з боку мясцовых гаспадарнікаў хапіла. Калгаса “Кастрычнік”, а базай ён выбраў вёску Пасырава, даўно і ў паміне няма. Так, выжывае ўскраіна аднаго вялікага аб’яднанага селькаскааператыва. Выжывае не без дапамогі і ўсё таго ж Крупскага. Ёсць у яго і дабротная вытворчая база, і тэхніка, і 355 гектараў зямлі. Ёсць добры сад, агарод. Палі апрацоўваюцца і засяваюцца рознымі відамі зерневых культур, бульбай і т.д.
В.В. Крупскі – чалавек шчодрай душы. Таму звяртаюцца да яго за дапамогай не толькі тутэйшыя вяскоўцы, а і многія гараджане – асабліва прадстаўнікі дзіцячых і медыцынскіх устаноў.
Красамоўным сведчаннем яго павагі і аўтарытэту служыць той факт, што выбаршчыкі Дудаковіцкай акругі №21абралі яго дэпутатам Круглянскага раённага Савета дэпутатаў. З гэтымі грамадскімі абавязкамі ён спраўляецца дастойна. Дзень свайго 50-годдзя Віталь Валер’евіч адзначаў працай на родным палетку: ішла пасадка капусты. А пры такой спякоце зрабіць гэта не так і проста.
Ганаровую грамату раёнага Савета дэпутатаў, якой В.В. Крупскі узнагароджаны за вялікі ўклад у сацыяльна-эканамічнае развіццё раёна, прывезлі прама на вытворчую базу. Там, у зацені яблыневага саду, яе і ўручылі.
Добраму чалавеку за добрыя справы сказалі і самыя добрыя словы старшыня райсавета дэпутатаў В.І. Ерковіч, іншыя адказныя работнікі раённага Савета дэпутатаў і райвыканкама.
НА ЗДЫМКУ: Ганаровую грамату В.В. Крупскаму ўручае старшыня райсавета дэпутатаў В.І. Ерковіч.
Тэкст і фота А. Паўлава.