КАЛІ ПРАЦА ПА ДУШЫ
У ліку пераможцаў раённага спаборніцтва працаўнікоў жывёлагадоўлі за летне-пашавы перыяд утрымання жывёлы ў 2011 годзе прагучала і прозвішча аператара машыннага даёння кароў Ракушаўскай МТФ ЧСУП “Круглянскі-Агра” Ж
У ліку пераможцаў раённага спаборніцтва працаўнікоў жывёлагадоўлі за летне-пашавы перыяд утрымання жывёлы ў 2011 годзе прагучала і прозвішча аператара машыннага даёння кароў Ракушаўскай МТФ ЧСУП “Круглянскі-Агра” Жаны Пудзікавай. За час утрымання дойнага статка на кругласутачным выпасе Жана атрымала ад кожнай каровы сваёй групы па 2913 кілаграмаў малака.
Асеннія досвіткі познія. У 6 гадзін раніцы вёска Ракушава яшчэ ахутана густым змрокам. А Жана, перарабіўшы ўсе неабходныя дамашнія справы, управіўшыся з гаспадаркай, ужо выходзіць за весніцы: трэба спяшацца на ранішнюю дойку. Жанчына падстаўляе твар лістападаўскаму ветру і на душы робіцца лёгка і спакойна. Да пачатку дойкі яшчэ цэлая гадзіна, а на дарогу да фермы Жана затрачвае хвілін дзесяць. Побач, звычайна, крочыць і муж Дзмітрый, ён працуе на МТФ слесарам.
На ферме даяркай робіць і родная сястра Жаны Наталля Балабуева. Так што ў іх тут склаўся своеасаблівы сямейны падрад. Калісьці тут жа даіла кароў і маці, Зоя Барысава, была перадавой сярод даярак. Жана бегала на ферму ёй дапамагаць і многаму тады навучылася.
Закончыўшы школу, дзяўчына паехала ў горад, вучылася ў Магілёўскім ПТВ-18 на кандытара. Працаваць пасля вучобы прыехала ў Круглае ў аддзел грамадскага харчавання райпа.
— Я нядоўга там папрацавала, — падзялілася Жана ўспамінамі пра мінулае, — перайшла на птушкафабрыку, рабіла на інкубатары. Вы ведаеце, мне больш па душы вясковая праца, звязаная з жывёлай, з гаспадаркай. Напэўна ад бацькоў гэта ўсё перадалося.
У хуткасці лёсам дзяўчыны стаў хлопец Дзмітрый з роднай вёскі.
Пасялілася маладая сям’я жыць у доме яго бацькоў, нарадзілася дачушка Насця.
— Насця цяпер ужо вучыцца ў 11-м класе, — расказвае пра дачку Жана Мікалаеўна, — яна наша памочніца. І сынок Сярожа, яму чатырнаццаць, таксама ўсё па дамашняй гаспадарцы робіць. Мы іх змалку да працы прывучылі. А як жа інаш, я і муж цэлы дзень заняты на ферме, прыбяжым дадому ў абед на якую гадзіну-дзве, ды зноў да жывёлы спяшаемся. Я раней цялят глядзела, і вось ужо 16 гадоў кароў даю, — дадае Жана.
— Жана Пудзікава, — старанная, адказная даярка, — расказала загадчыца Ракушаўскай МТФ Галіна Рагоўская. – Жывёлу вельмі любіць. Таму і надоі добрыя. Я думаю, што гадавы паказчык у яе будзе на належным узроўні. І пра яе мужа, Дзмітрыя Пудзікава, можна сказаць толькі добрае. Ён таксама даўно працуе на ферме, адказны, добрасумленны, выконвае не толькі абавязкі слесара, але і робіць іншую работу. Добрыя надоі і ў Наталлі Балабуевай, у Валянціны Гарусавай. Гэта тры лепшых даяркі з нашай фермы, — дадала загадчыца. — На іх трымаецца ў нас вытворчасць малака.
Мы размаўлялі з Жанай Пудзікавай ва ўтульным пакоі адпачынку. І мне ўсё больш і больш падабалася гэтая шчырая вясковая працаўніца, якая вельмі любіць сваю справу.
— Мы не расходзімся з фермы пасля дойкі, — казала яна, — патрэбна яшчэ раздаць каровам караняплоды, атрымаць муку, а галоўнае — дагледзець маленькіх цялятак.
Пазней я убачыла тых цялятак, кругленькіх, чысценькіх, дагледжаных.
— Іх у мяне цяпер шэсць засталося, — патлумачыла Жана, — а яшчэ нядаўна было адзінаццаць. Адправілі на дарошчванне пасля месячнага ўзросту. Патрэбна паклапаціцца, каб малыя набіралі належныя сутачныя прывагі. А вось і муж ужо мяне кліча, пара ехаць атрымліваць муку, — прагаварыла Жана, як бы прасіла прабачэння, што перапыняе размову.
Мы развіталіся. Але я ўпэўнена, што мы яшчэ сустрэнемся з Жанай, каб зноў расказаць пра поспехі і дасягненні аператара машыннага даення невялікай фермы.
С. ВАРАПАЕВА.
НА ЗДЫМКУ: аператар машыннага даення ЧСУП «Круглянскі-Агра» Жана Пудзікава.
Фота У. Гайдука.