–Выдадзеныя класікамі беларускія творы ніколі не старэюць. Яны толькі адзначаюць свае чарговыя юбілеі.

–Выдадзеныя класікамі беларускія творы ніколі не старэюць. Яны толькі адзначаюць свае чарговыя юбілеі. – З гэтымі словамі звярнулася да вучняў 6 “Б” класа настаўніца беларускай мовы і літаратуры СШ №1 г.п. Круглае С.Г. Мілеўская. Святлана Генадзьеўна правяла з вучнямі на класнай гадзіне мерапрыемства пад назвай “Кніжная мазаіка”, прысвечанае кнігам-юбілярам 2014 г. беларускіх пісьменнікаў.
Сярод кніг-юбіляраў у гэтым годзе — раман І. Шамякіна “Атланты і карыятыды”, напісаны 40 гадоў назад. 50 гадоў назад прыйшла да чытачоў «Альпійская балада» Васіля Быкава, а 55 гадоў спаўняецца зборніку вершаў П. Броўкі “Пахне чабор”. 80 гадоў мінула з таго часу, як пабачыла свет коласаўская “Дрыгва”. А п’еса Я. Купалы “Тутэйшыя” была надрукавана 90 гадоў назад.
Мерапрыемства праводзілася ў форме завочнай экскурсіі ў плане асобных прыпынкаў жыцця і творчасці класікаў. Першым прыпынкам стаў праспект пісьменнікаў. Вучні як бы зазіралі да іх у госці, праходзілі жыццёвы і творчы шлях, завочна пабывалі ў месцах нараджэння творцаў. Другі прыпынак – кніжны бульвар. Гэта ўжо непасрэднае знаёмства з кнігамі, іх рэклама. Вызначэнне, які з твораў старэйшы па ўзросту. Дзеці чыталі вершы, прыводзілі цытаты, радкі з праграмных вершаў паэтаў. І трэці прыпынак “Не сумуй-ка” прайшоў у форме віктарыны. Успаміналі У. Караткевіча, Я. Коласа, Я. Купалу, П. Броўку і іншых класікаў беларускай літаратуры. Угадвалі, з якога твора цытаты, і многае іншае. А пераможцай віктарыны стала Насця Прылепка. Яна і атрымала прыз — білет на канцэрт “Бацькі атамана”, які праходзіў у Круглянскім РДК.
Радуе тое, што вось на такіх невялікіх мерапрыемствах, якія падрыхтоўваюць і праводзяць настаўнікі, дзеці вучацца любіць сваю родную мову, чытаць кнігі беларускіх пісьменнікаў. І вядома, любіць сваю родную зямлю, якая такая шчодрая на неўміручыя таленты.
С. ВАРАПАЕВА.