Як ніколі раней, запозненай выдалася сёлетняя вясна. На палетках зямля яшчэ пераўвільготнена, цяжкія пасяўныя і глебаапрацоўчыя агрэгаты пакуль не могуць уключыцца ў работу.

Як ніколі раней, запозненай выдалася сёлетняя вясна. На палетках зямля яшчэ пераўвільготнена, цяжкія пасяўныя і глебаапрацоўчыя агрэгаты пакуль не могуць уключыцца ў работу. Але ж ёсць участкі, даступныя ўжо для тэхнікі. Аднымі з першых у раёне яшчэ ў канцы мінулага тыдня прыступілі да пасяўной у поўным разуменні гэтага слова хлебаробы ЗАТ «АСБ-Агра Цяцерына» і СВК «Іскра». Менавіта ў «Іскры» і пабывалі нашы карэспандэнты.
Вось у ліку першых вывеў у поле свой энегранасычаны трактар “Беларус-3022” у агрэгаце з дыскатарамі Міхаіл Конанаў, адзін з вядомай усяму раёну хлебаробскай дынастыі. Ён рыхтуе да засявання палетак за вёскай Літоўск. У адным звяне з ім шчыруюць на трактарах МТЗ-82 і МТЗ-920 з раскідвальнікамі мінеральных угнаенняў Генадзь Кірыленка і Аляксандр Саксонаў.
—За светлавы дзень, — расказвае рабочы-палявод Дзмітрый Медзвядкоў, — загружаем у бункеры іх агрэгатаў па 20 – 25 тон сыпучых тукаў. Вядома, для мяне з напарнікам нагрузка вялікая. Аднак стараемся, нездарма ж у народзе кажуць, што веснавы дзень год корміць. Працуем ад світання да змяркання. Эканамічная служба распрацавала сістэму аплаты працы, якая дазваляе за два тыдні, а менавіта такія сціслыя тэрміны адведзены ў нас на пасяўную, зарабіць добрыя грошы. Кіраўніцтва паклапацілася і пра забяспячэнне ўсіх удзельнікаў веснавой пасяўной гарачым харчаваннем. Абед і вячэру роўна ў вызначаны час нам дастаўляюць са сталовай гаспадаркі. Цана – сімвалічная. Ежа смачная і каларыйная.
На адным ускрайку вялікага палетка, што прытуліўся да лесу, ідзе перадпасяўная падрыхтоўка глебы, зямля сілкуецца мінеральнымі ўгнаеннямі, а на другім поўным ходам ідзе сяўба аўса. Штодня перавыконвае норму выпрацоўкі адзін з вопытнейшых механізатараў Вячаслаў Міцькоў. Своечасовую запраўку насеннем забяспечвае яшчэ адзін з механізатараў Конанавых — Сяргей. Насеннае зерне, якое засыпаецца ў бункер камбінаванавай сеялкі RАBЕ, што агрэгатуецца з трактарам ATLES , папярэдне пратручана, апрацавана хімікатамі ад хвароб і шкоднікаў.
Брыгадзірам, калі так можна сказаць, у механізатараў, што працуюць на палетку паблізу Літоўска, з’яўляецца Віктар Наглы — адзін са старэйшын механізатарскай гвардыі гаспадаркі. Шаноўны ўзрост ужо не дазваляе Віктару Міхайлавічу шчыраваць за рулём трактара. А вось ягоныя парады вельмі дарэчы маладзейшым калегам.
М. ВАДАП’ЯН.