ПЕСНЯЙ СЛАВІЛІ РАДЗІМУ
Днямі ў раённым Доме культуры распачаўся першы этап фестываля “Мая Кругляншчына”.
Днямі ў раённым Доме культуры распачаўся першы этап фестываля “Мая Кругляншчына”.
Гэта мерапрыемства праводзіцца ўжо не першы год і кожны раз выяўляе новыя таленты, адкрывае новыя імёны і збірае шмат энергічных і таленавітых людзей нашага раёна.
Праводзіцца “Мая Кругляншчына” у два этапы ў выглядзе “творчых справаздач”. На першым этапе свае творчыя калектывы прадстаўляюць арганізацыі і прадпрыемствы Круглага. Другі этап – творчыя справаздачы сельскагаспадарчых вытворчых кааператываў раёна. Фестываль праходзіць з мая па лістапад і заканч-ваецца канцэртам лепшых творчых калектываў і, канешне ж, узнагароджаннем пераможцаў.
28 мая свае выступленні прадставілі калектывы раённага аддзела адукацыі. Спецыялісты аддзела, школы, дзіцячыя садкі – усе прымалі ўдзел у фестывалі. Тым больш, што працаўнікі ў гэтай вобласці заўсёды адрозніваліся неардынарным складам розуму і таленавітасцю.
Распачаўся канцэрт з беларускай народнай песні “Пойдзем, пойдзем лугам”, якую выконваў фальклорны ансамбль настаўнікаў сярэдняй школы №1 г.п. Круглае. Гэты калектыў на сцэне не навічок. Сярод іншых узнагарод, ён з’яўляецца яшчэ і пераможцам раённага фестываля “Песня застаецца з чалавекам”.
Наступны выступоўца – удзельнік усіх раённых мерапрыемстваў квартэт ясляў-сада №3 г.п. Круглае з песняй “Ой, дзе ж ты была”. Дарэчы, гэты квартэт уваходзіць у састаў ансамбля “Крынічанька” раённага Дома культуры.
Калектыў дзіцячага сада №3 амаль у поўным саставе заўсёды выступае на ўсіх раённых мерапрыемствах. Таленавіты чалавек, таленавіты ва ўсім. Вось і загадчыца садка Наталля Шчацінка спявае, колькі сябе памятае.Пачынала ў далёкім дзяцінстве, потым — школа, вучылішча – увесь час песня ішла побач па жыцці. І зараз яна паспяхова сумяшчае працу загадчыка дзіцячага сада з выступленнямі на раённай сцэне.
Наступная ўдзельніца – вучаніца сярэдняй школы №2 Аня Гарусава. Гэта вельмі таленавітая дзяўчына. Яна добра вучыцца, займае прызавыя месцы на прадметных алімпіядах, з’яўляецца прызёрам абласнога і рэспубліканскага этапу конкурсу “Піянер года” і, канешне, спявае. На фестывалі яна прадставіла песню “Привет, моя Родина”.
Сучасны педагог – гэта чалавек вельмі рознабаковы. Удзельнікі ансамбля Цяцерынскай школы – не выключэнне. Яны – лаурэаты рэспубліканскага фестывалю “У вершах і песнях аб Перамозе”, удзельнікі абласнога свята “Александрыя збірае сяброў” і ўсіх раённых мерапрыемстваў. У выкананні ансамбля прагучала песня “Вечарынка”.
Яшчэ шмат таленавітых, яскравых выступленняў было ў гэты дзень у Доме культуры. Гледачы не сумавалі ні хвіліны і кожнага самадзейнага артыста праводзілі бурнымі апладысментамі.
Напэўна, няма такога чалавека, які б хоць раз у жыцці не марыў аб сцэне. Раённы фестываль “Мая Кругляншчына” дае магчымасць кожнаму здзейсніць сваю мару, раскрыць свой талент. А, калі вельмі захацець, то мары збываюцца.
В. ГАЙДУК.
Фота В. КУБЕКА.