У рамках раённага фестывалю “Мая Кругляншчына” нядаўна на сцэне РДК адбывалася чарговае мерапрыемства — творчыя справаздачы калектываў мастацкай самадзейнасці УКП “Жылкамгас”, РКЦ5 філіяла ААТ “Белаграпрам

У рамках раённага фестывалю “Мая Кругляншчына” нядаўна на сцэне РДК адбывалася чарговае мерапрыемства — творчыя справаздачы калектываў мастацкай самадзейнасці УКП “Жылкамгас”, РКЦ5 філіяла ААТ “Белаграпрамбанк” і ДРБУ-214. Атрымалася не толькі яркае незабыўнае дзейства, дзе ў любові да роднай краіны ў песнях і вершах прызнаваліся нашы таленавітыя і працавітыя землякі , але і выявіліся новыя таленты, адкрыліся новыя імёны на “зорным” небасхіле Кругляншчыны.
Сапраўды народным і самабытным каларытам была насычана канцэртная праграма – творчая справаздача працаўнікоў УКП “Жылкамгас”. Пра таленты гэтых самадзейных артыстаў, дарэчы, не аднойчы паведамлялася на старонках раённага друку. І на гэты раз у зале не было ні аднаго раўнадушнага гледача, шчодрымі апладысментамі яны дзякавалі кожнаму з выступоўцаў. А адкрывала праграму яе вядучая Таццяна Маркава – у прыгожым нацыянальным касцюме з вяночкам на галаве, сімвалізуючы сабой вобраз Беларусі. Пранікнёна і прачулена гучыць у яе выкананні верш У. Караткевіча “На Беларусі Бог жыве”.
Цешылі гледачоў у каторы раз сваім выступленнем “Аксаміткі” – жаночы вакальны ансамбль, у складзе якога, акрамя Таццяны Маркавай, супрацоўнікі жылкамгаса Таццяна Мацюшэўская, Алена Дудкевіч, Вольга Смольская (салісткі), Галіна Цыпянкова, Вольга і Ганна Вакар, Вольга Дзмітрыева.
У іх выкананні гучалі песні патрыятычнага зместу мясцовых аўтараў: “Зямлі круглянскай партызаны” (словы В. Бяляцкага, музыка Я. Шаблінскага), “Тры бярозы” (словы М. Кушнярова, музыка Л. Галыгінай) і іншыя.
Вельмі цікавай у выкананні гэтых жа самадзейных артыстаў атрымалася фальклорная кампазіцыя “Купалле”. Гэта сапраўдны купальскі эцюд з народнымі песнямі, карагодамі, дзействам. Тут былі і дзяўчаты з вяночкамі, і рабяткі – памочнікі Купалінкі…
Дарэчы, дзеці працаўнікоў прадпрыемства заўсёды актыўныя на сцэне. І ў гэты раз пелі і танцавалі для публікі Аня Малюкова, Яўгенія Мінчукова, Таццяна Часновіч, Кацярына Мацюшэўская і Яна Лукашэвіч.
Як прызнаваліся потым, першы раз выйшлі на раённую сцэну ўдзельніцы жаночага вакальнага калектыву, якія прадстаўлялі творчую справаздачу РКЦ5 філіяла ААТ “Белаграпрамбанк”. А гэта шасцёра абаяльных і прывабных спецыялістаў данай банкаўскай установы – Іна Чарняева, Наталля Салавей, Алена Гукетлава, Наталля Грыцава, Марыя Новікава і Людміла Сазановіч. Дарэчы, Алена Гукетлава тут дэбютавала і як дыкламатар, яна выканала верш пра родную Кругляншчыну мясцовага паэта Віктара Бяляцкага, а Марыя Новікава распачала на раённай сцэне сольную “кар’еру”.
Невялікай, але даволі яркай і рознапланавай была канцэртная праграма, падрыхтаваная ўдзельнікам і мастацкай самадзейнасці ДРБУ-214. Інжынер-лабарант прадпрыемства Алена Астапенка выступіла як салістка з песняй “Птушка”. “Серебряной метелью” парадавала прысутных у глядацкай зале Леакадзія Максімава. Спадабаўся ўсім і танцавальны нумар у выкананні Алены Астапенка і Марыны Гутаравай (аператар ЭВМ). Дарожны рабочы Дзмітрый Гронскі мае талент ігры на гітары, пад асабісты акампанемент ён выканаў песню У. Высоцкага “Канатоходец”. А больш за ўсіх апладысментаў дасталася юнаму Арцёму Бараўцову за ігру на акардэоне і майстэрскае выкананне сучаснай байкі. Тата хлопчыка, Ігар Уладзіміравіч – інжынер па ахове працы ДРБУ-214, быў вельмі рады за сына. Пасля заканчэння канцэрта “вердыкт” гледачоў быў аднолькавым: “Вельмі спадабалася”. У людзей узняўся настрой, загарэліся вочы, як бывае звычайна, калі штосьці вельмі ўражвае. Любоў да прыгожага, роднай Айчыны – бясконцыя і вечныя пачуцці…
Л. МОШУЛЬ.
Фота В. Кубека.