Клуб “Прырода і фантазія” імя Л.І. Чарняўскага, які існуе ў Мінску, у рамках праекта “Твори Благо” з выставай “Душы асалода” здзяйсняе турнэ-круіз па гарадах Беларусі.
Днямі завітаў ён і ў наша Круглае.

Клуб “Прырода і фантазія” імя Л.І. Чарняўскага, які існуе ў Мінску, у рамках праекта “Твори Благо” з выставай “Душы асалода” здзяйсняе турнэ-круіз па гарадах Беларусі.
Днямі завітаў ён і ў наша Круглае.
На адкрыццё выставы, якая размешчана ў раённым краязнаўчым музеі, былі запрошаны такія кампетэнтныя суразмоўцы, як начальнік аддзела ідэалагічнай работы, культуры і па справах моладзі райвыканкама Сяргей Лазоўскі і дырэктар цэнтралізаванай бібліятэчнай сістэмы Тамара Кавалеўская. Сустракала гасцей дырэктар раённага гісторыка-краязнаўчага музея Війа Гапаева. За працяглы час у сценах музея пабывала шмат цікавых выстаў з розных куткоў рэспублікі. А гэтая вельмі адметная тым, што ў ёй паказаны і выкананы вельмі рэдкі від народнай творчасці (піраграфія) — выпальванне ўзору на тканіне. Піраграфічныя карціны на сценах адразу прыцягваюць увагу. Яны быццам жывыя, адметныя, непаўторныя ў афарбоўцы. Кіраўнік клуба Аляксандр Лейко — чалавек творчы, ініцыятыўны, і на выставе віднае месца занялі яго работы. Майстр займаецца разьбой па дрэву. Аляксандр Аляксандравіч напачатку расказаў аб дзейнасці клуба, а пасля ўручыў у падарунак раённаму краязнаўчаму музею карціну-копію керамічнай пліткі з гербам сямейства Радзівілаў у стылі піраграфіі і дзевяць кніг Эдуарда Самойлава — члена клуба, мастака і паэта. Разам з кіраўніком прыехалі ў Круглае майстар па выпальванню па тканіне Валянціна Някрасава і лентачны дызайнер Аэліта Міхалевіч. Яны прадэманстравалі прысутным сваё майстэрства.
Калісьці ў клуб “Прырода і фантазія” уваходзіла Акадэмік Міжнароднай акадэміі тэатра, народная артыстка СССР Стэфанія Станюта, якая разам з народнымі майстрамі падарожнічала па краіне. Яна і зараз — ганаровы член клуба, а ў памяць аб ёй вырабы, якія артыстка змайстравала сваімі рукамі, калегі возяць з сабой. На выставе ў Круглянскім гісторыка-краязнаўчым музеі была прадстаўлена біжутэрыя, вырабленая артысткай з прыродных матэрыялаў.
Прыгажосць – яна заўсёды перад намі, і стварыць яе можна з любой дробязі, толькі трэба зірнуць на тое, што побач, зрокам творцы-майстра. Варта праявіць фантазію і рукі прыкласці. Менавіта аб гэтым і сведчыць выстава “Асалода душы”. Прабудзе яна ў краязнаўчым музеі да сакавіка. І, напэўна, тым, хто наведае яе, захочацца паспрабаваць стварыць што-небудзь сваімі рукамі, адчуць, якая гэта радасць, калі нараджаецца цуд. Як, напрыклад, і вось гэтая карціна “Ноч перад Ражством” Валянціны Някрасавай, выкананая ў стылі піраграфіі. Такія карціны, падзелкі ўпрыгожаць любы інтэр’ер, стануць добрым падарункам. І, вядома, той, хто пабудзе на выставе, атрымае асалоду душы.
С.ВАРАПАЕВА.