Васьмітысячны рубеж па надоях пераадолела ў мінулым годзе аператар машыннага даення Казіміроўскай МТФ ПСУП “Круглянскі-Агра” Таісія Ласянкова (на здымку).

Васьмітысячны рубеж па надоях пераадолела ў мінулым годзе аператар машыннага даення Казіміроўскай МТФ ПСУП “Круглянскі-Агра” Таісія Ласянкова (на здымку). Ведаючы, што гэтая даярка заўсёды ў ліку лепшых не толькі ў гаспадарцы,але і ў раёне, захацелася даведацца,як ідуць у яе справы сёлета. Дарэчы, у жывёлаводаў зараз вельмі адказны час. На вуліцы канец красавіка і дойны статак выходзіць на кругласутачны выпас.
Аказалася, што, як і раней, Таісія Віктараўна старанна працуе і мае прыбаўку па надоях малака ў сваёй групе. Яна зноў наперадзе ва ўнутрыгаспадарчым і ў раённым спаборніцтве. За тры месяцы (студзень– сакавік) гэтага года атрымала ад кожнай каровы па 1826 кілаграмаў малака.
Самымі добрымі словамі характарызуюць гэтую руплівую працаўніцу загадчыца МТФ “Казіміроўка» Ірына Бераснева, сяброўкі па працы. Прычым, адзначаюць не толькі выключную стараннасць, але і кажуць пра яе добразычлівы характар, гатоўнасць прыйсці на дапамогу ў выпадку неабходнасці тым, хто побач.
— Стараемся не знізіць планку па надоях. З выхадам кароў на пастаянную пашу малако павінна прыбавіцца, — пачала размову Таісія.
Падчас гутаркі адчувалася, што яна па-сапраўднаму хвалюецца за сваю справу, дбае, і каб надоі важкія давала кожная рагуля замацаванай группы, і каб якасць сырадою была добрай.
–Спрабавала я нядаўна памяняць месца працы, — прызналася мне Таісія, — але вярнулася назад у свой калектыў, дзе чатырнаццаць гадоў адпрацавала, бо зразумела, да чаго ляжыць душа. А да работы ў жывёлагадоўлі з маленства прывыкла. Маці і бацька на ферме працавалі. Дапамагала ім. Родам я з вёскі Гаваракі Шклоўскага раёна, там вырасла, закончыла школу, пасля вывучылася на кандытара ў Магілёве, працавала па спецыяльнасці.
А на Кругляншчыну замуж выйшла, тады і пачала працаваць у жывёлагадоўлі — працягвала расказваць жанчына. — Муж Сяргей з Казіміроўкі родам, жывём з ім па вуліцы Жуніна. Две дачкі, Марына і Вольга, таксама абаснаваліся ў Круглым, недалёка ад роднага дома. Наведваюць нас часта, унукі падрастаюць Максімка і Настачка.
Сапраўды, падумалася мне, чалавек бывае шчаслівы, калі знаходзіць радасць у штодзённых справах і клопатах.
Святлана Варапаева.