Адданы любімай справе
У ТАКОГА НАСТАЎНІКА ДЗЕЦІ НЕ ВЫРАСТУЦЬ БЕЛАРУЧКАМІ.
Сельская ўстанова агульнай сярэдняй адукацыі… Мусіць, кожны з нас перакананы ў той асаблівай важнасці і значнасці сельскай школы ў жыцці яе вучняў, ды і ў жыцці вёскі ўвогуле. Сельскія хлопчыкі і дзяўчынкі праводзяць у школе большую частку свайго часу. І роля настаўніка на вёсцы, дзе ўсе адзін аднаго ведаюць, асаблівая. Ён заўсёды ў цэнтры падзей, на віду. Да сельскага настаўніка, як правіла, звяртаюцца за слушнымі практычнымі парадамі і дапамогай вучні і іх бацькі.
Педагогі нашай установы адукацыі менавіта такія – адкрытыя, сумленныя, неабыякавыя. Адзін з такіх сапраўдных прафесіяналаў – настаўнік тэхнічнай працы Сяргей Леанідавіч Кубека. Усяго некалькі гадоў ён выкладае ў нашай школе, хоць за плячыма ў яго багаты педагагічны вопыт у якасці настаўніка тэхнічнай працы, загадчыка аддзела тэхнічнай творчасці раённага цэнтра творчасці дзяцей і моладзі.
Сяргей Леанідавіч – творчы, адданы любімай прафесіі настаўнік. У свой час ён паспяхова закончыў Аршанскае педагагічнае вучылішча па спецыяльнасці “Настаўнік тэхнічнай працы і чарчэння”, а крыху пазней, у больш сталым узросце, – Беларускі дзяржаўны педагагічны ўніверсітэт імя М. Танка па спецыяльнасці “Выкладчык выяўленчага мастацтва, чарчэння і народных мастацкіх рамёстваў, педагог-мастак”. Спалучэнне дзвюх атрыманых спецыяльнасцей дазваляе яму эфектыўна працаваць па фарміраванні асноў кампетэнтнасці вучняў у розных сферах працоўнай, дэкаратыўна-прыкладной і тэхнічнай творчасці, што, несумненна, спрыяе сацыялізацыі асобы вучняў установы.
Плённая творчая праца педагога дае выдатныя вынікі: у бягучым навучальным годзе вучні С.Л. Кубекі занялі ганаровае ІІІ месца ў абласных этапах рэспубліканскіх конкурсаў “ТэхнаЁлка”, “Выратавальнікі вачыма дзяцей”. Дарэчы кажучы, зусім нядаўна ў г. Мінску былі падведзены вынікі апошняга этапу ХХІ Рэспубліканскага агляду-конкурсу “Выратавальнікі вачыма дзяцей”, дзе сямікласнікі Яўгеній Кулік і Уладзімір Цалавальнік былі ўдастоены дыпломаў ІІ ступені.
Жыццё чалавека – гэта пастаяннае імкненне да поспеху і прызнання. Поспех педагога здольнасці вучняў. Заўсёды прыемна канстатаваць аб пэўных станоўчых выніках. Высокі прафесіяналізм і адказнае стаўленне С.Л. Кубекі да даручанай справы ўпэўніваюць у тым, што новыя вяршыні чакаюць наперадзе гэтага адданага прафесіі настаўніка.
Таццяна ЖУКОЎСКАЯ,
намеснік дырэктара па вучэбнай рабоце ДУА “Цяцерынскі НПК дзіцячы сад –сярэдняя школа».