Педагогі і выхаванцы старшай групы ясляў-сада №2 г. Круглае прымаюць актыўны ўдзел у міжнародным праекце-посткросінгу супрацоўніцтва спецыялістаў устаноў дашкольнай адукацыі краін СНД “Планета дзяцінства”. Аднойчы нам прыйшло адразу два лісты ад дзяцей дашкольнага ўзросту і іх выхавацелей з Расіі (гарадоў Саратава і Падольска). Пісьмы зацікавілі нашых выхаванцаў, у іх узнікла шмат пытанняў: як з’явіліся першыя пісьмовыя лісты, як яны дастаўляліся, якую ролю адыгрываюць у жыцці чалавека, што патрэбна ведаць для таго, каб адправіць ліст. І мы вырашылі правесці даследаванне на тэму “Падарожжа ў свет пісьмаў” і знайсці адказы на ўсе пытанні. Інфармацыю здабывалі з Інтэрнэту, у працэсе экскурсіі ў паштовае аддзяленне, гутарак з паштальёнам Алай Міхайлаўнай Фраловай, якая прыносіць газеты і лісты ў наш дзіцячы садок. Дзеці даведаліся, што раней, калі не было камп’ютараў і сотавых тэлефонаў, пісьмы мелі вялікае значэнне для людзей. З іх дапамогай можна было мець зносіны на адлегласці, паведамляць навіны са свайго жыцця, віншаваць адно аднаго са святамі. Падчас даследавання нашы выхаванцы зразумелі: каб атрымліваць пісьмы, трэба навучыцца іх пісаць Як гэта можна зрабіць? І тут яны ўспомнілі, што старажытныя людзі не ведалі літар, але пасылалі адзін аднаму пісьмы. Замест літар і слоў там былі малюнкі, таму такое пісьмо называлася малюнкавым. У выніку нашы дзеці вырашылі навучыцца пісаць кароткія пісьмы з дапамогай малюнкаў. Разам з выхавальніцай Вольгай Валер’еўнай Краўцовай яны вучыліся пісаць піктаграмы-малюнкі – знакі, якія нешта абазначаюць. Напрыклад, дзве палоскі – гэта дарога, сэрцайка – любіць, торт – дзень нараджэння і г. д. З малюнкаў складалі пісьмы, у якіх хлопчыкі і дзяўчынкі расказвалі пра сваю сям’ю, дамашніх гадаванцаў, любімыя заняткі ў дзіцячым садзе і дома. Дзеці абменьваліся пісьмамі адно з аднымі і вучыліся іх “чытаць”.
На II этапе Рэспубліканскага конкурсу даследчых работ дзяцей дашкольнага ўзросту “Я – даследчык” работа нашых выхаванцаў Алега Новікава, Дар’і Вясёлкінай і Міланы Семчанка “Чаму людзі пішуць пісьмы?” атрымала Дыплом III ступені ў намінацыі “Бюро знаходак”.
Галіна Атрашкевіч,
намеснік загадчыка па асноўнай дзейнасці яслей-сада №2 г. Круглае.