Гары, гары ясна, купальскае вогнішча

Заўсёды весела і сапраўды чароўна праходзіць у Круглым ноч на Івана Купалу, бо яна нясе людзям веру ў шчасце і цуд, пачуццё радасці і хараство свята. Як і ў папярэднія гады, сёлетняе масавае гулянне адбывалася ў цэнтральным парку культуры і адпачынку. На ўпрыгожанай маляўнічымі дэкарацыямі і кветкамі сцэне шматлікім удзельнікам свята прапанавалася цікавае тэатралізаванае прадстаўленне, галоўнымі арганізатарамі якога выступілі спецыялісты цэнтралізаванай бібліятэчнай сістэмы раёна, далучыліся да іх і працаўнікі іншых галін культуры, і ўдзельнікі мастацкай самадзейнасці.

Шырокім попытам карысталіся і гандлёвыя рады, разгорнутыя побач, з сувенірамі ды цацкамі, салодкай ватай ды папкорнам і іншымі прысмакамі. Але больш за ўсё раскупляліся купальскія вянкі, што выпляталі на продаж прама тут, як кажуць, не адыходзячы ад касы, з палявых кветак і траў майстры раённага Дома рамёстваў. І дзякуючы ім сярод абаяльных удзельніц святкавання памнажалася колькасць прыгажунь-Купалінак, а разам з тым і па-асабліваму прыўзняты настрой, і сапраўды чароўная атмасфера.
У вясёлае, поўнае цікавых прыгод казачнае падарожжа разам з героямі тэатралізацыі, Русалкай і Вадзянікам, Лесуном і Кікімарай Балотнай, студэнтамі Іванам і Марусяй і іншымі, запрашаў са святочнай сцэны дух лета – Купала. З задавальненнем усе жадаючыя, а асабліва – дзеці, назіралі за разгарнуўшыміся падзеямі, перажывалі за Марусю, трапіўшую ў царства Вадзяніка, і за Іванку, шукаўшага Папараць-кветку, каб вызваліць дзяўчыну, дружна весяліліся, расшчодрыўшыся на ўсмешкі, спявалі і танцавалі.
Звонкім рэхам разнасіліся па парку шчырыя віншаванні і пажаданні. Не абышлося, канешне ж, без варажбы і вясёлых конкурсаў-гульняў, самыя актыўныя ўдзельнікі якіх атрымалі падарункі ад Русалачкі. Бальзамам па душы ліліся песні (дарэчы, усенародна любімую і да болю знаёмую з іх – “Купалінка, купалінка, цёмная ночка…” – у пачатку святкавання падаравала гасцям мерапрыемства Анастасія Громава). Сваімі выступленнямі таксама парадавалі гледачоў пад час тэтралізаванага прадстаўлення і святочнага канцэрту, які распачаўся пасля яго, Мікіта Захараў, Аляксандра Рылькова, Ліна Ляшнеўская, Аляксандр Карабаеў, Вольга Лініч, Яўген Шаблінскі і іншыя таленты круглянскай зямлі.
На славу атрымалася і купальскае вогнішча, вакол якога сабралася шмат землякоў-круглянцаў і гасцей нашага горада. Хай жа яно, як і расцвітаючая ў гэтую чароўную ноч, па народных павер’ях, Папараць-кветка, нясуць людзям шчасце і дабрабыт.

     

Марына ПАДГАЕЦ.