Незвычайную міні-экспазіцыю падрыхтавалі ў чытальнай зале цэнтральнай раённай бібліятэкі супрацоўнікі аддзела інфармацыі і абслугоўвання. Тут на агляд наведвальнікаў выстаўлены дэкаратыўныя падковы і падковы, вырабленыя, выкаваныя ў мінулых вяках, якія падараваў для экспазіцыі ветэран працы з г. Круглае Леанід Шчуплянкоў.
Ініцыятарам задумы аформіць міні-экспазіцыю сталі загадчыца аддзела Наталля Салтанава і бібліятэкар Галіна Гарцуева. Наталля і аўтару гэтых радкоў расказвала шмат цікавага аб выкарыстанні падковы як сімвала.
Падкова ў традыцыйнай культуры беларусаў лічылася вельмі моцным і надзейным абярэгам ад нячыстай сілы і дрэнных людскіх вачэй. Казалі: “Знайсці падкову –знайсці шчасце”. Па форме падкова нагадвае дзённы шлях сонца на небасхіле, вясёлку, якая падпірае неба пасля дажджу, растучы месяц, браму неўміручасці ва ўходзе ў Рай. Славянская традыцыя – вешаць падкову рожкамі ўніз, тым самым яна паўтарала страху хаты і засцерагала сям’ю і ўсю сядзібу ад перуновых стрэл. Лічылася, што ў хату, над дзвярыма якой вісіць падкова, ніколі не патрапіць нячыстая сіла, не зойдзе кепскі чалавек, каб прынесці бяду. Верылі, што здзейсніцца таямнічае жаданне, калі знойдзеную падкову кінуць праз левае плячо.
Населены пункт Круглае ўпершыню ўпамінаецца ў пісьмовых крыніцах у 1524 годзе. Князь Васіль Палубінскі – дзяржаўны і ваенны дзеяч ВКЛ, атрымаў прывілею на тры мястэчкі ў Цяцерынскай воласці, якія яму ўступіў князь Міхаіл Мсціслаўскі, адно з іх – Круглае. Княжыцкі род Палубінскіх выкарыстоўваў герб Ястржэмбец. У блакітным полі залатая падкова, павернутая шыпамі ўверх, у сярэдзіне якой кавалерскі крыж, а над шлёмам і каронай ястраб, які глядзіць у правы бок, з прывязанымі да лапы бубеньчыкамі, трымае такую ж падкову. Гэты шляхецкі герб і быў узяты за аснову сучаснага герба і флага г.Круглае.
У нашым горадзе сімвалам абласнога фэст-кірмашу працаўнікоў вёскі “Дажынкі-2015” стала Падкова шчасця, створаная з бронзы магілёўскім скульптарам Андрэем Вараб’ёвым, якую ўсталявалі ў цэнтры ўрачыстасцяў паміж РДК і цэнтральным паркам адпачынку. Падкова шчасця нашага горада складаецца з дзвюх палавінак. На адной скульптар размясціў “смачны” нацюрморт, на другой – сельскія пейзажы з абрысамі славутасцей Кругляншчыны. Завяршаюць задуму каласы і палявыя кветкі. Падкова шчасця з’яўляецца не толькі напамінам пра “Дажынкі-2015”, але і месцам, куды прыходзіць моладзь, каб пачэрпнуць энергіі любові і дабрыні, жыць шчасліва, пабраўшыся шлюбам.
Чытачы спыняліся ля экспазіцыі, цікавіліся, распытвалі. Загадчыца аддзела інфармацыі і абслугоўвання Наталля Салтанава падкрэсліла тое, што наведвальнікам бібліятэкі вельмі падабаюцца міні-экспазіцыі, таму будуць і новыя задумкі.
Святлана Варапаева.