Яны працуюць на перспектыву
Пад рубрыкамі “За эфектыўнасць гаспадарання” і праграма “Малако” мы звычайна друкуем матэрыялы малочнай тэматыкі.
Пад рубрыкамі “За эфектыўнасць гаспадарання” і праграма “Малако” мы звычайна друкуем матэрыялы малочнай тэматыкі. І папракаць нас за гэта не варта, бо менавіта сырадой, малако прыносіць асноўны, а калі б так мовіць, то і галоўны прыбытак усім сельгаспрадпрыемствам. І летам, і зімою. І гэта сапраўды так. Пакуль вырасцім зерне, пакуль выгадуем на мяса жывёлу – часу вунь колькі трэба. А малако ў малакаправоды штодня цячэ. І асабліва інтэнсіўна зараз, улетку.
Звычайна мы ставім высокія надоі ў заслугу перш за ўсё даяркам ды даглядчыкам-пастухам. Але ж ёсць у гэтым “ланцужку” яшчэ адно звяно, не памылюся пазначыць яго як галоўнае – тэхнікі-асемянатары. У кожнай гаспадарцы раёна пабудаваны сучасныя малочнатаварныя комплексы з даільнымі заламі, дасканалым абсталяваннем. А надоі пакуль жадаюць чакаць лепшага. Пытанне рашаецца ў даным плане ў асноўным толькі за кошт укаранення найсучаснейшых тэхналогій кармлення ды даення рагуль. Але тры ці пяць разоў яе спрабуй даіць – малака ад гэтага не прыбудзе.
–Трэба мець пастаянна добры рэзерв для папаўнення і абнаўлення дойнага статка, — кажа намеснік начальніка райсельгасхарчу па жывёлагадоўлі Рыгор Вярховін. – Не бачу неабходнасці ў масавым парадку закупляць цялушак у іншых раёнах. У асноўным статку ў гаспадарках ёсць каровы, цялушкі , якія маюць высокі прадуктыўны патэнцыял. Тут ужо слова за тэхнікамі-асемянатарамі. Гэтыя людзі сапраўды, так бы мовіць, працуюць на заўтрашні дзень галіны, і ў рашаючай ступені вызначаюць яе будучае, а ўрэшце рэшт, і заўтрашні дзень, дабрабыт нашых сельгаспрадпрыемстваў.
Удзел у конкурсе прынялі 13 спецыялістаў племянной справы з усіх гаспадарак. Экзаменавала іх прафесіянальнае журы, у склад якога ўваходзілі спецыялісты Магілёўскага галоўнага дзяржаўнага племпрадпрыемства, а таксама начальнік філіяла гэтага прадпрыемства па нашаму раёну Віктар Будай. Канкурсанты трымалі экзамен як па тэорыі, так і па практычным валоданні спецыяльнасцю.
Трэба зазначыць, што кампетэнтная “судовая калегія” апынулася перад вельмі складаным выбарам, паколькі ўсе ўдзельнікі конкурсу дэманстравалі як выдатныя практычныя навыкі, так і ўменне весці неабходную дакументацыю, паказвалі грунтоўныя тэарэтычныя веды.
Лепшай жа ў гэтым “плематра-дзе” ужо не ў першы раз была прызнана кіраўнік малочнатаварнага комплексу “Ахімкавічы “СВК “Іскра” Галіна Камарова. Яна не толькі ўзначальвае вядучае ў гаспадарцы і самае “грашовае” прадпрыемства, але і дасканала ведае і выконвае абавязкі тэхніка-асемянатара. І прыплод маладняку на комплексе ў разліку на сто кароў – адзін з самых высокіх не толькі ў гаспадарцы, але і ў раёне.
Другую і трэцюю прыступкі гонару падзялілі паміж сабою калегі і сяброўкі – тэхнікі-асемянатары СВК “Круглянскі Рассвет” Ала Віцюгова і Аксана Ісачанка. На фермах, якія яны абслугоўваюць, высокі прыплод цялят, маладняк расце здаровым. Цёлачкі неўзабаве папоўняць асноўны дойны статак сельгаспрадпрыемства.
Акрамя таго, што былі вызначаны лепшыя тэхнікі- асемянатары, вынікі конкурсу падводзіліся яшчэ і ў такіх намінацыях, як “Лепшы малады спецыяліст”, “За шматгадовую добрасумленную працу і за высокія вытворчыя паказчыкі”.
Узнагароды і падарункі знайшлі сваіх уладальнікаў і лаурэатаў ва ўсіх конкурсных намінацыях.
М. ВАДАП’ЯН.
Фота В. Кубека.
НА ЗДЫМКЕ: пераможцы і прызёры конкурсу тэхнікаў-асемянатараў раёна Галіна Камарова, Аксана Ісачанка і Ала Віцюгова. Аксане ўручае падарунак намеснік начальніка райсельгасхарчу райвыканкама Рыгор Вярховін.