Яравы палетак КСУП “Някрасава-Агра” — адзін з самых вялікіх у раёне. Толькі зерневых трэба пасеяць амаль 1200 гектараў. А яшчэ 800 гектараў у гаспадарцы адведзена пад кукурузу, 40 – пад грэчку.

Яравы палетак КСУП “Някрасава-Агра” — адзін з самых вялікіх у раёне. Толькі зерневых трэба пасеяць амаль 1200 гектараў. А яшчэ 800 гектараў у гаспадарцы адведзена пад кукурузу, 40 – пад грэчку. Дадайце да гэтага аднагадовыя травы – і вы адчуеце ўсю маштабнасць работ на веснавым полі, якія трэба выканаць механізатарам названага сельгаспрадпрыемства.
— Сёлетняя пасяўная ў “Някрасава-Агра” для мяне – першая, — расказвае галоўны аграном гаспадаркі Аляксандр Сідарэнка. — Раслінаводчую службу я ўзначаліў толькі ў лютым. І хаця ў агранамічнай справе не навічок – працаваў па спецыяльнасці ў Бялыніцкім раёне, — напачатку адчуваў сябе ніякавата. І ў першую чаргу па той прычыне, што гаспадарка вялікая, як па тэрыторыі, так і па плошчы сельскагаспадарчых угоддзяў. Але хутка супакоіўся, бо, як высветлілася, прыйшоў не на пустое месца. Зімой і ўвосень час тут марна на трацілі – нарыхтавалі дастатковую колькасць арганічных угнаенняў, адрамантавалі глебаапрацоўчую і пасяўную тэхніку. Дарэчы, “арсенал” энерганасычанай тэхнікі ў нас – адзін з самых моцных у раёне -– чатыры трактары Беларус-3022, яшчэ два Беларус-3522. З такой тэхнікай можна рашаць любыя задачы.
І, як аўтар гэтых радкоў даведаўся непасрэдна ад кіраўніка сельгаспрадпрыемства Аляксандра Паддубскага, тэхнічны і людскі патэнцыял у “Някрасава-Агра” выкарыстоўваецца эфектыўна, з поўнай аддачай.
— На сённяшні дзень, — расказваў кіраўнік сельгаспрадпрыемства, — у нас пасеяны ўжо раннія зерневыя. Сёлета працягваем трымаць накірунак на ўмацаванне кармавой базы для жывёлы, што ўтрымліваецца на фермах. У першую чаргу за кошт травяністых кампанентаў. З мэтай папаўнення колькасці бялку ў рацыёнах БРЖ пасеялі 150 гектараў люцэрны, з якой атрымліваецца не толькі выдатная зялёная падкормка, але і высокапажыўны сянаж.
Трэба адзначыць, што веснавую пасяўную ў гаспадарцы сёлета ўскладніла тое, што дрэнна перазімаваў азімы рапс. Больш 200 гектараў яго прыйшлося перасяваць. Але і з такой даволі не малой “дабаўкай” у “Някрасава-Агра” справіліся паспяхова. Баланс рапсавага палетка адноўлены.
Працягвалася сёлетняй вясной ў сельгаспрадпрыемстве і закладка шматкампанентных пашавых угоддзяў з тым, каб гаспадарка на высокапажыўным розна-траўі (засяваецца паша сумессю з васьмі кампанентаў) магла атрымліваць высокія надоі малака і прыбаўленні ў вазе маладняку БРЖ.
— Улічваючы рапс, — працягваў размову Аляксандр Сідарэнка, — па стану на 23 красавіка ў нас яравыя пасеяны на плошчы 1200 гектараў.
У ліку лепшых працаўнікоў веснавога поля асабліва хацеў бы адзначыць Міхаіла Чэхунова, які на трактары МТЗ-1221 у агрэгаце з раскідвальнікам МТТ-4У унёс мінеральныя ўгнаенні на плошчы звыш двух тысяч гектараў. На падрыхтоўцы глебы вызначаецца механізатар Анатоль Садоўскі, які працуе на трактары Беларус-3522 у агрэгаце з чызельным культыватарам. А яго калега Уладзімір Фралоў таксама штодня перавыконвае зменныя нормы выпрацоўкі на трактары Беларус-3022 з дыскатарам.
Завяршаюць жа ўвесь цыкл работ сейбіты. Права класці насенне ў глебу даверана, як і водзіцца, самым лепшым і адказным. З ранку і да змяркання шчыруюць у полі на трактарах Беларус-3022 і Беларус-3522 з сеялкамі АПКМ-6 і RABE механізатары Іван Рэут і Яўген Фралоў, Уладзімір Сіпайла і Валерый Кувека.
— А ўвогуле, — сказаў, развітваючыся з журналістамі, Аляксандр Паддубскі, — на пасяўной у нашай гаспадарцы гультаёў і бракаробаў няма. І мы стараемся аказваць тым, хто самааддана шчыруе ў полі з культыватарамі, дыскамі, сеялкамі, працуе на іншай тэхніцы, максімум увагі. Двойчы на дзень механізатары атрымліваюць смачнае гарачае харчаванне. У гонар перадавікоў на цэнтральнай сядзібе ўздымаецца флаг працоўнай славы. А яшчэ стымулюе людзей на выніковую працу дастойная яе аплата. Адным словам, зроблена ўсё для таго, каб правесці веснавую пасяўную ў лепшыя тэрміны і якасна.
І мы ніколькі не сумняваемся ў тым, што ў някрасаўцаў гэта атрымаецца.
М. ВАДАП’ЯН.
НА ЗДЫМКАХ: механізатар КСУП “Някрасава-Агра” Валерый Кувека; ідзе сяўба яравых зерневых.
Фота В. Кубека.