Працуе на будучы ўраджай
У гэты дзень з самай раніцы неба было зацягнута бухматымі хмарамі, ліў дождж.
У гэты дзень з самай раніцы неба было зацягнута бухматымі хмарамі, ліў дождж.
Механізатары ЧСУП “Круглянскі -Агра” у час, калі непагадзь прыпы-ніла працу ў полі, знаходзіліся на мехдвары, займаліся аглядам і рамонтам тэхнікі.
–Цяпер для нас кожная хвіліна на вагу золата, — прызнаўся адзін з іх, Дзмітрый Часновіч.– Сяўба ўпэўнена вядзе свой адлік. А мудрая прымаўка кажа: “Што пасееш, тое і пажнеш”.
Іменна з ім і было ў мяне запланавана пагутарыць у гэты дзень, ведаючы, што місія ў яго адказная ў час пасяўной. Дзмітрый шчыруе зараз на палетках сельгаспрад-прыемства на трактары Atles-946 з сеялкай «Rabe». А нядаўна рыхтаваў глебу пад сяўбу дыскатарам АД-600, каб пульхнай была яна, каб у мяккую зямлю клалася насенне.
Робіць Дзмітрый сваю справу толькі на «выдатна», не навічок у полі, ужо дзесяты год працуе ў калектыве сельгаспрадпрыемства, а агульны механізатарскі стаж налічвае яшчэ больш часу.
–Я нарадзіўся ў вёсцы Новае Пашкава, пад Магілёвам, — расказаў Дзмітрый.– А ў Круглае бацькі мае пераехалі жыць, калі быў зусім маленькім. Спадабаўся ім гарпасёлак. Тут я і рос. Маці працавала ў дзіцячым садку №3 райцэнтра, бацька – вадзіцелем УКП “Жылкамгас”. Ён і навучыў абыходзіцца з тэхнікай. Закончыўшы школу, падаўся я на вучобу ў Бялыніцкае ПТВ, дзе атрымаў спецыяльнасць механізатара. Уладкаваўся таксама на працу ў жылкамгас. Там і лёс свой сустрэў. Алеся працавала на гэтым жа прадпрыемстве.
У 2006 годзе перайшоў у “Круглянскі-Агра”. Спачатку на «Кіраўцы» працаваў, потым мне даверылі Atles-946.
Цяпер прозвішча стараннага механізатара добра вядома ў раёне. Бо неаднаразова выходзіў ён пераможцам раённага спаборніцтва за дасягненне найвышэйшых вытворчых паказчыкаў.
– Я вельмі люблю час сяўбы, — прызнаўся Дзмітрый, — вясна дае надзею на будучае.
Люблю сваю работу, а калі ўвечары вяртаюся дадому стомлены, сустракаюць радасна жонка Алеся, школьніца дачушка Таня і сынок Сцёпа, які ходзіць у дзіцячы садок.
Калі адчуваеш, як разумеюць і падтрымліваюць цябе блізкія людзі, то і на працы справы ладзяцца.
Сёння на рахунку стараннага механізатара звыш 400 засеяных гектараў. У цэлым жа па гаспадарцы пад яравымі культурамі занята плошча ўжо больш чым у 1000 гектараў.
Пакуль мы размаўлялі з Дзмітрыем, дождж крыху пацішэў, неба пасвятлела.
–Выедзем сёння ў поле, — ўпэўнена сказаў механізатар. Ён па-сапраўднаму хвалюецца за сваю справу,ведаючы, які адказны гэты час – час вясновай пасяўной.
С.Варапаева.
НА ЗДЫМКУ: механізатар ЧСУП «Круглянскі-Агра» Дзміт-рый Часновіч.
Фота аўтара.