Круглае рыхтуецца да вялікага свята – абласных “Дажынак-2015”. Гэта бачна ўсюды, бо наш утульны гарадок ператварыўся ў адзіную будаўнічую пляцоўку. Паўсюдна з’яўляюцца ўсё новыя і новыя элементы аздаблення.

Круглае рыхтуецца да вялікага свята – абласных “Дажынак-2015”. Гэта бачна ўсюды, бо наш утульны гарадок ператварыўся ў адзіную будаўнічую пляцоўку. Паўсюдна з’яўляюцца ўсё новыя і новыя элементы аздаблення.
Аб прадстаячай падзеі нагадваюць ужо і першыя маляўнічыя плакаты на гасцініцы — «Хвала рукам, што пахнуть хлебам», школе мастацтваў — «Мой родны кут, як ты мне мілы» і інш.
Рэканструкцыя тратуараў і дарог выклікае, безумоўна, пэўныя нязручнасці і для пешаходаў, і для вадзіцеляў. Але ўсе разумеюць, што будучая прыгажосць ствараецца не па ўзмаху чароўнай казачнай палачкі. Ды і добрыя вынікі бачныя: гэта і шыкоўна аздобленая плошча каля Дома кульутры, і прывабная арка на ўваходзе ў цэнтральны парк, і аб’язная дарога, і сотні метраў новых тратуараў, і асобныя адмарафечаныя жылыя шматпавярхоўкі, і многае іншае.
Горад маладзее і прыгажэе прама на вачах. Львіную долю работ, без усялякага перабольшвання, узяў на сябе калектыў вядучай будаўнічай арганізацыі – ПМК-266. Аб яго справах мы расказвалі ўжо, і будзем расказваць яшчэ не адзін раз.
А на сёння ёсць неабходнасць сказаць колькі добрых слоў і ў адрас УКП “Жылкамгас”. Другі год гэтую клопатную ва ўсіх адносінах службу ўзначальвае вопытны адміністратар Віктар Крыванос, які да гэтага меў вялікую практыку работы кіраўніком, толькі ў іншых вытворчых сферах. І тут многае атрымліваецца, дзякуючы новым неардынарным падыходам і патрабаванням.
Сёння працэс аптымізацыі закрануў і калектыў жылкамгасаўцаў, але, тым не менш, аб’ёмы работ ніколькі не скарачаюцца, а наадварот — толькі нарошчваюцца. Галоўнае
абласное свята працаўнікоў вёскі “Дажынкі-2015” дабавіла гэтых самых клопатаў у разы,
хаця ад асноўных абавязкаў іх ніхто не вызваляў: ідуць падрыхтоўчыя работы да прадстаячага зімовага ацяпляльнага перыяду. Да прыкладу, для рамонту абсталявання кацельных і цеплавой гаспадаркі створана мабільная брыгада з 6 вопытных спецыялістаў.
Вялікія ўвага па-ранейшаму ўдзяляецца падтрыманню райцэнтра ў належным санітарным стане. З раніцы і да позняга вечара гудуць, нібы чмялі, у парку, скверах, на газонах мотакосы. А сіламі двух брыгад па 5 чалавек у кожнай абкошваецца 80-гектарная тэрыторыя. І не па аднаму разу. Першая брыгада працуе з 6 да 14, другая – з 14 да 22 гадзін.
Асобная тэма – новая бетанаваная агароджа, што, як зноў жа, цяжка не заўважыць, з’явілася на цэнтральнай і прылягаючых да яе вуліцах. Дакладней сказаць, агароджа камбінаваная – з бетанаваных слупоў і ніжніх плітаў, а таксама шчыкету. Набыць матэрыялы з драўніны жылкамгасу дапамагаюць, да іх гонару, асобныя прыватныя прадпрымальнікі. Агульная працягласць ужо замененай агароджы – звыш 3,5 кіламетра. І работы працягваюцца. На гэтыя патрэбы было закуплена 70 тон цэменту і каля двух тон арматуры.
На мінулым тыдні разам з дырэктарам УКП “Жылкамгас” Віктарам Крываносам мы праехалі па вуліцах райцэнтра, дзе вядуцца работы па «дажыначнай праграме», пазнаёміліся з ходам работ, звязаных з вырабам бетонных слупоў і пліт. Зноў жа, працуюць брыгады ў дзве змены. Выкарыстоўваецца спецыяльнае абсталяванне. Прапарцыянальны склад раствору вывераны практыкай. Сюды трэба дабавіць і адказнасць лю-дзей. Гэта і дае станоўчы вынік. Дарэчы, на даных работах у гэты час задзейнічаны спецыялісты кацельных.
Убачылі мы таксама, як рыхтуюцца ары-гінальныя драўляныя столікі і лавачкі. К слову, новыя кампазіцыі ўжо з’явіліся ў найбольш людных месцах. Усе яны прывязаны да ўнікальнага прыроднага ландшафту. Добрыя дызайнерскія рашэнні, да прыкладу, знойдзем у мікрараёне Слабодка, дзе ёсць ужо і дэкаратыўны “бярозавы масток”, і чаротавы будан, ці каля вадасховішча на рэчцы Сітня ў Круглым, дзе апрача лавачак і століка «прышвартавалася» і прыцягальная для жыхароў і гасцей нашага горада лодачка-паруснік. На ёй таксама ёсць месцы для адпачынку. Адразу два сады «выраслі» у раёне колішніх агародаў па вуліцы Гагарына — каменны і яблыневы.
Зразумела, што да канца верасня, калі і плануюцца “Дажынкі”, такіх месцаў з’явіцца яшчэ нямала.
На ўездзе ў цэнтр Круглага па вуліцы
Магілёўскай па-новаму вырашана скарыстаць і наяўную пагоркавасць ландшафту – да ранейшай кветкавай кампазіцыі-прызнання “Я Круглае” і імправізаванага вадаспаду дабавіліся “Беларускі ручнік” і “Старажытны замак”.
Сапраўдным мастацтвам павінны стаць і прыгожыя клумбы. Апрача традыцыйных кветак тут актыўна выкарыстоўваюцца дэкаратыўныя дрэвы, шчэбень, камень і іншыя складаемыя. Нейкіх прафесійных дызайнераў у раёне няма. Падыход такі – усе зробленае павінна выглядаць камфортна і прыцягальна.
Ёсць і чыста дрэвавыя кампазіцыі. Усяго пад намечаную праграму ўжо высаджана звыш 1000 дрэў, кустоўнікаў, а таксама мноства кветак. Штодня толькі на іх паліў выкарыстоўваецца 6-7 аўтацыстэрнаў вады па чатыры тоны ў кожнай. Сярод дрэў апрач традыцыйных лясных можна сустрэць на вуліцах горада і нямала дэкаратыўных, закупленных у спецыялізаваных пітомніках.
Зразумела, усё, што мы сёння расказалі, гэта толькі частка таго вялікага аб’ёму, які яшчэ прадстаіць выканаць. Бу-дзем спадзявацца, што не застануцца ў баку ад гэтай пачэснай работы, звязанай з падрыхтоўкай да свята «Дажынкі-2015», таксама іншыя працоўныя калектывы, гаспадары прыватных сялібаў.
А. ПАЎЛАЎ.